Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 189 Hüküm no: 177 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Kostanti’nin kendisini bıçakla yaralayan Osman Beşe b. Mehmed ile sulh oldukları Mahrûse-i Galata’da Sultan Bayezid mahallesinde mütemekkin Dimitri v. Kostanti v. Yorgi nâm zimmî tarafından husûs-ı âti’l-beyâna vekîl olduğu Mustafa Beşe b. Ahmed ve Süleyman Beşe b. Hasan nâm kimesneler şehâdetleriyle sâbit olan Mehmed Çelebi b. Abdullah nâm kimesne meclis-i şer‘-i şerîf-i nebevîde işbu râfi‘u’l-vesîka Osman Beşe b. Mehmed nâm kimesne mahzarında bi’l-vekâle ikrâr ve takrîr-i kelâm edip mezbûr Osman Beşe târih-i vesîkadan beş gün mukaddem mahalle-i mezbûrede âlet-i cârihadan beyâz kabzalı bıçak ile müvekkilim mezbûrun sağ kasığı altından amden bi-gayrı hakkın darb ve cerh etmeğin müvekkilim mezbûr dahi cerh-i mezkûrun mûceb-i şer‘îsini mezbûrdan da‘vâ eyledikde ol dahi bi’l-külliye inkâr etmeğle müvekkilim mezbûr dahi müdde‘âsına bir şâhid istimâ‘ etdirdip bir şâhid dahi ikāmet üzere iken beynlerinde muslihûn tavassut edip da‘vâ-yı mezkûresinden müvekkilim mezbûru on iki guruş üzerine inşâ-i akd-i sulh eylediklerinde ol dahi ber-vech-i muharrer sulh-i merkūmu ba‘de’l-kabûl ve bedel-i sulh olan meblağ-ı mezbûr on iki guruşu mezbûr yedinden tamâmen ahz u kabz eyledikden sonra cerh-i mezkûra vemâ yahdesü anhuya müte‘allika âmme-i da‘vâdan merkūm Osman Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi ol dahi müvekkil-i mezbûra medfû‘u olan on iki guruşa müte‘allika âmme-i da‘vâdan kezâlik müvekkilim mersûmun zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-şehr-i Şevvâli’l-mükerrem sene 1137. Şuhûdü’l-hâl: Ahmed Usta b. Mustafa, Mustafa Beşe b. Ahmed, Halil Çelebi b. Mustafa, Ahmed Efendi b. Süleyman, Ali Efendi b. Ömer.