Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 189 Hüküm no: 178 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin kendisini yaralayan Abdullah Çelebi ve kardeşi Osman b. Ali ile sulh oldukları Mahrûse-i Galata muzâfâtından İstinye nâhiyesine tâbi‘ Boğazkesen Hisarı mahallâtından Meydan mahallesi sâkinlerinden es-Seyyid Mehmed Çelebi b. Himmet nâm kimesne meclis-i şer‘de mahrûse-i mezbûre hâricinde Bedreddin Bey mahallesi sükkânından işbu râfi‘u’l-kitâb es-Seyyid Abdullah Çelebi b. el-Hâc Ali nâm kimesne ile gāib ani’l-meclis Osman b. el-Hâc Ali b. Abdülkerîm nâm kimesne tarafından ikrâr-ı âti’z-zikri tasdîka sâbitü’l-vekâle vekîli olan Ali Beşe b. Abdi nâm kimesneler mahzarında bi-tav‘ihî ikrâr ve takrîr-i kelâm edip mezbûr es-Seyyid Abdullah târih-i kitâbdan on dört gün mukaddem mahrûse-i mezbûre hâricinde Bedreddin Bey mahallesinde vâki‘ mekābir-i Müslimînde beyne’s-salâteyn birer deste ta‘bîr olunur ağaç ile sağ omzum başına bi-gayrı hakkın darb eylediğinden mâ‘adâ beni kollarımdan ahz ve li-ebin er karındaşı gāib ani’l-meclis müvekkil-i mezbûr Osman dahi bıçak ile sağ tarafımdan baş böğrümden darb ve cerh etmeğle ben dahi mezbûrândan mûceb-i şer‘îsini da‘vâ sadedinde olmuş idim el-hâletü hâzihî beynimize muslihûn tavassut edip da‘vâ-yı mezkûremden mezbûr es-Seyyid Abdullah ve vekîl-i mezbûr Ali Beşe ile beni an-inkâr sekiz guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr sekiz guruşu mezbûr es-Seyyid Abdullah ile vekîl-i mezbûr Ali Beşe yedlerinden tamâmen ahz u kabz eylediğimizden sonra darb-ı mezbûr ile cerh-i mezkûra ve mâ yuhdesü anhuya müte‘allika âmme-i de‘âvî ve mutâlebât ve eymân ve muhâsamâtdan mezbûr es-Seyyid Abdullah ile karındaşı müvekkil-i mezbûr Osman’ın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde mezbûr es-Seyyid Abdullah ile vekîl-i mezbûr Ali Beşe’den her biri sulh-i mezbûr sekiz guruşa müte‘allika âmme-i da‘vâdan benim zimmetimi ibrâ ve ıskāt eylediler dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-Şevvâli’l-mükerrem sene 1137. Şuhûdü’l-hâl: es-Seyyid Ali Ağa b. Hasan, es-Seyyid Ca‘fer Çelebi b. es-Seyyid Ali, Mustafa Beşe b. Mehmed, Ya‘kub Beşe b. Receb, es-Seyyid Mehmed b. Osman, es-Seyyid Salih Çelebi b. es-Seyyid Ya‘kub, Halil Çelebi b. Mustafa.