Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 190 Hüküm no: 179 Orijinal metin no: [25a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manuk v. Mıgırdıç’ın İbrahim b. Abdullah ile alacak davasında sulh oldukları Mahrûse-i Galata’da Sultan Bayezid mahallesinde sâkin gazzâz tâifesinden Manuk v. Mıgırdıç nâm Ermeni meclis-i şer‘de manav tâifesinden işbu râfi‘u’l-kitâb İbrahim b. Abdullah nâm kimesne mahzarında ikrâr ve takrîr-i kelâm edip mezbûr İbrahim yedinden dört sene mukaddem karz-ı hasen doksan guruş ahz u kabz edip ve meblağ-ı mezbûr için bu âna gelince bilâ-devr-i şer‘î rıbh-ı mahz olmak üzere mezbûr İbrahim’e yüz yirmi guruş verip ve hâlen meblağ-ı mezbûr doksan guruşu dahi kendüye tamâmen edâ ve teslîm edip bilâ devr-i şer‘î makbûzu olan meblağ-ı mezbûr yüz yirmi guruşu mezbûr İbrahim’den da‘vâ eylediğimde ol dahi mukaddemâ sana yüz elli guruş verip ve meblağ-ı mezbûrdan doksan guruş ile murâbaha nâmıyla bilâ devr-i şer‘î ancak yetmiş iki guruş ahzını ikrâr ziyâde kırk sekiz guruşu inkâr etmeğle beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip da‘vâ-yı mezkûremden mezbûr İbrahim ile beni dokuz guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr dokuz guruşu mezbûr İbrahim yedinden tamâmen ahz u kabz eylediğimden sonra husûs-ı mezkûra ve târih-i kitâba gelince beynimizde cereyân eden sâir ahz u i‘tâya müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-Şevvâli’l-mükerrem sene 1137. Şuhûdü’l-hâl: el-Hâc Mustafa b. Osman bazarbaşı, Abdurrahman Çelebi b. Abdürrezzak, İbrahim Çelebi b. Muharrem, Halil Çelebi b. Mustafa, İbrahim Çelebi b. Mustafa, Mustafa Beşe b. Receb, Yusuf b. Abdullah, Yusuf b. Abdullah, Ali b. Abdurrahman.