Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 191 Hüküm no: 180 Orijinal metin no: [25a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Hüseyin b. Süleyman b. Abdullah’ı bıçakla yaralayan Laz Mehmed b. Mustafa’dan Fatıma bt. Ali’nin davacı olduğu Mahrûse-i Galata hâricinde Bedreddin Bey mahallesinde sâkin kalafatcı tâifesinden Hüseyin b. Süleyman b. Abdullah nâm kimesnenin zevcesi ve tarafından zikri âtî da‘vâya vekîl olduğu es-Seyyid Ya‘kub b. es-Seyyid Musa ve İbrahim b. Hüseyin nâm kimesneler şehâdetleriyle sâbit olan işbu râfi‘u’l-vesîka Fâtıma bt. Ali nâm hâtun meclis-i şer‘de Dergâh-ı âlî yeniçerilerinden Laz Mehmed b. Mustafa nâm kimesne mahzarında <> bi’l-vekâle üzerine da‘vâ ve takrîr-i kelâm edip mezbûr Laz Mehmed târih-i kitâbdan bir gün mukaddem mahrûse-i mezbûre hâricinde Kalafatyeri nâm mahallde rû-yı deryâda sal üzerinde kable’z-zuhr âlet-i cârihadan beyaz kabzalı bıçak ile zevcim müvekkil-i mezbûru sağ omzu başından ve sağ küreği üzerinden iki yerden amden bi-gayrı hakkın darb ve cerh etmeğle hâlâ suâl olunup mûceb-i şer‘îsi icrâ olunmak matlûbumdur dedikde[25b] gıbbe’s-suâl ve akībe’l-inkâr vekîl-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup yine tâife-i mezbûreden İbrahim b. Hüseyin ve Süleyman b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka mezbûr Laz Mehmed bir gün mukaddem bizim huzûrumuzda işbu müdde‘iyye-i mezbûrenin zevci müvekkil-i mezbûr Hüseyin’i târih-i kitâbdan bir gün mukaddem mahrûse-i mezbûre hâricinde Kalafatyeri nâm mahalde rû-yı deryâda sal üzerinde kable’z-zuhr âlet-i cârihadan beyaz kabzalı bıçak ile amden bi-gayrı hakkın sağ omzu başından ve sağ küreği üzerinden iki yerinden darb ve cerh eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûle olmağın mûcebi ber-i tâm husûlüne tevkīf olunup mâ-vaka‘a bi’l-ibtigā ketb olundu. Fi’l-yevmi’s-sânî aşer min-Şevvâli’l-mükerrem sene 1137. Şuhûdü’l-hâl: İbrahim Çelebi b. Hamdullah, Halil Çelebi b. Mustafa, Mustafa b. Ahmed, İbrahim b. Mustafa, Ali b. Ahmed, Mehmed b. Ahmed.