Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 192 Hüküm no: 181 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çekdirici Ahmed b. Abdullah’ın Hadice bt. İbrahim’i yedi yıl önce boşadığı Mahrûse-i Galata muzâfâtından kasaba-i Kasımpaşa’da Sahaf Muslihiddin mahallesinde sâkine Hadice bt. İbrahim nâm hâtundan istihbâr-ı şer‘î sudûrundan sonra udûl-i ahrâr-ı ricâl-i Müslimînden olup mahalle-i mezbûre sâkinlerinden Süleyman b. Halil ve Mustafa b. Ahmed nâm kimesneler li-ecli’l-ihbâr meclis-i şer‘a hâzırân olup isre’l-istihbâr fi’l-hakīka işbu müstahbire mezbûre Hadice Hâtun’un zevci gāib ani’l-meclis Çekdirici Ahmed b. Abdullah b. Abdülkerîm târih-i kitâbdan yedi yıl mukaddem mahalle-i mezbûrede bizim huzûrumuzda zevcesi mezbûre Hadice Hâtun’u bâyinen tatlîk eyledi deyü muhbirân-ı mezbûrândan her biri keyfiyet-i muharrereyi alâ-tarîki’ş-şehâde haber vermeğin mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ aşer min-Şevvâli’l-mükerrem sene 1137. Şuhûdü’l-hâl: Mustafa Odabaşı b. İbrahim, Mehmed b. Ali, İbrahim b. Muharrem, Halil Çelebi b. Mustafa, İbrahim b. Mustafa, Ali Çelebi b. Ahmed.