Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 193 Hüküm no: 184 Orijinal metin no: [25b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Hüseyin’in el-Hâc Abdullah b. Ali’den muhalaa ile boşandığı Mahrûse-i Galata muzâfâtından kasaba-ı Fındıklı’da Selime Hâtun mahallesinde sâkine zâtı Ahmed Efendi b. Süleyman ve Abdurrahman Çelebi b. Hüseyin nâm kimesneler ta’rîfleriyle mu‘arrefe olan Rukiye bt. Hüseyin nâm hâtun meclis-i şer‘de zevc-i muhâlı‘ı işbu râfi‘u’l-kitâb el-Hâc Abdullah b. Ali nâm kimesne mahzarında ikrâr ve takrîr-i kelâm edip zevcim mezbûr Abdullah ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum cihetle zimmetinde mütekarrır ve ma‘kūdün-aleyh olan bin yedi yüz akçe mehr-i mü’eccelimden fâriğa olup nafaka-i iddet ve me’ûnet-i süknâm dahi kendi üzerime olup ve mezbûrun firâşından hâsılalar ve benden mütevellideler bi-hakkı’l-hıdâne hacr ve terbiyemde olan kızları Fâtıma ve Âişe nâm sagīreleri dokuz yaşına tekmîl edinceye değin kendi mâlımdan infâk ve iksâ etmek üzere zevcim mezbûr el-Hâc Abdullah ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ aşer min-Şevvâli’l-mükerrem sene 1137. Şuhûdü’l-hâl: İbrahim b. Muharrem, Halil Çelebi b. Mustafa, Mustafa b. Receb, İbrahim b. Mustafa.