Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 194 Hüküm no: 185 Orijinal metin no: [25b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Reis b. İbrahim’in Hüseyin b. Ramazan’a müdarebeden olan borcunu ödediği Mellâh tâifesinden Hüseyin b. Ramazan nâm kimesne meclis-i şer‘de sefîne reislerinden işbu râfi‘u’l-kitâb Osman Reis b. İbrahim nâm kimesne mahzarında ikrâr ve takrîr-i kelâm edip mezbûr Osman Reis’e târih-i kitâbdan on sekiz gün mukaddem vilâyet-i Anadolu’da Karadeniz sâhilinde Bartın İskelesi’nde alâ-tarîki’l-mudârebeti’ş-şer‘iyye kırk guruş karz olmak üzere yedi buçuk guruş ki cem‘an kırk yedi buçuk guruş verip ben dahi örf-i mellâhînde sandal ta‘bîr olunur sefînesinde mellâh olduğum hâlde dört günde İstanbul’a gelip sefer itamâm oldukda mezbûr Osman Reis meblağayn-ı mezbûreyn cem‘an kırk yedi buçuk guruşu mukaddemâ bana def‘ u teslîm ben dahi ahz u kabz eylemiş idim hâlâ mezbûr Osman Reis fâide-i hâsıladan benim re’s-i mâlıma isâbet eden beş guruş ile ücret-i mellâhiyeme isâbet eden üç guruş ki cem‘an sekiz guruşu dahi bana def‘ u teslîm eyledikde ben dahi yedinden tamâmen ahz u kabz eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis aşer min-Şevvâli’l-mükerrem li-sene seb‘a ve selâsîn ve mi’e ve elf. Şuhûdü’l-hâl: İbrahim b. Muharrem, Halil Çelebi b. Mustafa, İbrahim b. Mustafa, Mehmed b. Ahmed, Mustafa b. Ahmed.