Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 194 Hüküm no: 186 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühâni bt. el-Hâc Abdullah’ın kocası Hasan b. Abdullah’ın Bağdad’a giderken Diyarbekir yakınlarında bulunan Balya’da vefat ettiği ve oraya defnedildiği <> Mahrûse-i Galata muzâfâtından kasaba-i Kasımpaşa’da Piyale Paşa-yı Sagīr mahallesinde sâkine işbu râfi‘atü’l-vesîka Ümmühâni bt. el-Hâc Abdullah nâm hâtundan ber-vech-i âtî istihbâr-ı şer‘î sudûrundan sonra udûl-i ahrâr-ı ricâl-i Müslimînden olup mahalle-i mezbûre sükkânından Mahmud b. Veli ve Yusuf b. Abdullah nâm kimesneler li-ecli’l-ihbâr meclis-i şer‘a hâzırân olup isre’l-istihbâr işbu muhbire-i mezbûre Ümmühâni Hâtun’un zevci Hasan b. Abdullah b. Abdülmennân târih-i kitâbdan on dört ay mukaddem bizim ile ma‘an Bağdad tarafına gider iken esnâ-i tarîkde Diyarbekir kurbünde Balya kasabasında bi-emri’llâhi te‘âlâ marîzan vefât etmeğle hîn-i gaslinde cenâzesini mu‘âyene ve müşâhede eylediğimizden sonra kasaba-i mezbûre kurbünde vâki‘ mekābir-i Müslimînde defn eyledik deyü muhbirân-ı mezbûrândan her biri keyfiyet-i muharrereyi alâ-tarîki’ş-şehâde haber vermeğin mâ-hüve’l-vâkı‘ bi’t-taleb ketb olundu. Fi’l-yevmi’s-sânî aşer min-Şevvâli’l-mükerrem sene 1137. Şuhûdü’l-hâl: Ali b. Abdullah, İmâm Osman Efendi, Molla Hüseyin b. Mehmed, Osman b. Abdullah, Halil b. Mustafa.