Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 195 Hüküm no: 187 Orijinal metin no: [26a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zopi bt. Zaharya ile Anaştaş v. Dimitri’nin miras davasında sulh oldukları Mahrûse-i Galata hâricinde Hüseyin Ağa mahallesinde sâkine iken iki ay mukaddem hâlik olan Ezmarağda bt. Yorgi v. Savol nâm Nasrâniyenin sadriye kebîre kızı ve hasren vârisesi olup mahalle-i mezbûrede sâkine işbu hâmilü’r-rakīm Zopi bt. Zaharya nâm nasrâniye meclis-i şer‘-i hatîr-i lâzimü’t-tevkīrde li-ebeveyn kız karındaşı olup târih-i kitâbdan on iki sene mukaddem hâlike olan Cevheriye nâm Nasrâniyenin sadrî kebîr oğlu Anaştaş v. Dimitri nâm zimmî muvâcehesinde ikrâr ve takrîr-i kelâm edip merkūm Anaştaş târih-i kitâbdan kırk iki sene mukaddem hâlik olan ceddi Zaharya’dan anam hâlike merkūme Cevheriye kendüye isâbet eden hisse-i ma‘lûmesini hîn-i helâkına gelince yirmi sekiz sene anası merkūme Ezmarağda’dan almayıp bilâ özr-i şer‘î terk-i da‘vâ ve sükūt eyleyip ve anasının helâkinden sonra kendi dahi on iki sene sükūt edip ve bu makūle bilâ özr-i şer‘î zamân mürûr eden da‘vânın bilâ emr istimâ‘ı memnû‘ iken merkūm Anaştaş târih-i vesîkadan on dokuz gün mukaddem anam merkūme Cevheriye’nin ber-vech-i muharrer hisse-i ma‘lûmesi anası merkūme Ezmarağda yedinde kalıp ve hâlâ merkūme Ezmarağda dahi hâlike olmağla terekesini sen ahz u kabz eylediğin ecilden benden bi-gayrı hakkın iki yüz elli guruş ahz eyledin deyü merkūm Anaştaş‘dan da‘vâya tasaddî eylemiş idim el-hâletü hâzihî beynimize muslihûn tavassut edip da‘vâ-yı mezkûremden merkūm Anaştaş ile beni yüz elli guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûrun yüz guruşunu târih-i kitâbdan iki gün tamâmına değin ve elli guruşunu dahi altı ay tamâmına değin edâ eylemek üzere merkūm Anaştaş’ı ba‘de’t-te’cîl mâ‘adâsı olan yüz guruşa müte‘allika âmme-i da‘vâdan merkūm Anaştaş’ın zimmetini ibrâ ve ıskāt eylediğimde merkūm Anaştaş dahi cedd-i fâsidi babam hâlik-i merkūm Zaharya’nın terekesine müte‘allika ve târih-i kitâba gelince beynimizde cereyân eden sâir ahz u i‘tâya müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-Şevvâli’l-mükerrem sene 1137. Şuhûdü’l-hâl: Mustafa Odabaşı b. Abdullah, Mehmed Çelebi b. Ali, Ali Beşe b. Hüseyin, Süleyman Çavuş b. Ali, Veli Çavuş b. Ömer el-mübâşir, İbrahim Çelebi b. Muharrem, Halil Çelebi b. Mustafa, Abdullah Beşe b. Mahmud, İbrahim Çelebi b. Mustafa, Hüseyin Çelebi b. Eyüb, Ali Çelebi b. Ahmed, Hasan Beşe b. Abdullah, Ali Bey b. Abdullah, Molla Mehmed b. Yusuf, Mustafa b. Ahmed.