Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 196 Hüküm no: 188 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in Mustafa b. Mehmed’den muhalaa ile boşandığı Mahrûse-i Galata’da el-Hâc A‘mâ mahallesinde sâkine zâtı İbrahim Çelebi b. Mustafa ve Ahmed b. Veli nâm kimesneler ta‘rîfleriyle mu‘arrefe olan Hadice bt. Mehmed nâm hâtun meclis-i şer‘de zevc-i muhâlı‘ı işbu râfi‘u’l-vesîka Mustafa b. Mehmed nâm kimesne mahzarında ikrâr ve takrîr-i kelâm edip zevcim mezbûr Mustafa ile beynimizde hüsn-i zindegânemiz olmayıp hul‘a tâlibe ve râgıbe olduğum cihetle zimmetinde mütekarrır ve ma‘kūdün-aleyh olan bin beş yüz akçe mehr-i mü’eccel hakkımdan fâriğa olup nafaka-i iddet ve me’ûnet-i süknâm dahi kendi üzerime olmak üzere mezbûr Mustafa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis aşer min-Şevvâli’l-mükerrem sene 1137. Şuhûdü’l-hâl: İbrahim b. Muharrem, Halil b. Mustafa, İbrahim b. Mustafa, Ahmed b. Veli, Mehmed Çelebi b. Osman.