Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 196 Hüküm no: 189 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Rabia bt. Şaban’ın Duhani Mustafa Çelebi’den nafaka alacağı Mahrûse-i Galata’da Câmi‘-i Cedîd mahallesinde sâkine olup zâtı es-Seyyid Ali Ağa b. Hasan ve es-Seyyid Ca‘fer b. Mehmed ta‘rîfleriyle mu‘arrefe olan işbu râfi‘u’l-vesîka Şerife Rabia bt. Şa‘ban nâm hâtun mahfil-i şer‘de takrîr-i kelâm edip tüccârdan olan zevcim gāib ani’l-beled Duhânî Mustafa Çelebi b. Mehmed nâm kimesne bundan akdem diyâr-ı âhara gitdikde beni ve sagīr oğlu Ahmed’i bilâ nafaka terk edip ve nafaka cinsinden dahi bir nesne dahi irsâl eylemeyip nafaka ve kisve bahâya kemâl-i ihtiyâcımız olmağla zevcim gāib-i [26b] merkūm üzerine kıbel-i şer‘den kadr-i kifâye nafaka ve kisve bahâ farz ve takdîr olunması murâdımdır dedikde hâkim-i muvakk‘-ı a‘le’l-kitâb tûbâ-lehû ve hüsn- meâb efendi dahi mezbûre Şerife Rabia’yı ba‘de’t-tahlîfi’ş-şer‘î kendinin ve oğlu sagīr-i mezbûr Ahmed’in nafaka ve kisve ve masârıf-ı sâirelerinden zevci gāib-i mezbûr Duhânî Mustafa Çelebi üzerine târih-i kitâbdan mezbûre Şerife Rabia’ya on akçe ve sagīr-i mezbûra altı akçe ki cem‘an ikisine yevmî on altı akçe farz ve takdîr edip ve meblağ-ı mefrûz-ı merkūmu ber-vech-i muharrer nafaka ve kisve ve havâic-i zarûriyye-i sâirelerine harc ve sarfa ve lede’l-iktizâ istidâne ve ınde’z-zafer zevci gāib-i mezbûr üzerine rücû‘a mezbûre Şerife Rabia Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ aşer min-Şevvâli’l-mükerrem sene 1137. Şuhûdü’l-hâl: Mustafa Efendi b. İhsan, Ahmed Efendi b. Süleyman, Süleyman Efendi b. Osman, İbrahim b. Muharrem, Halil b. Mustafa.