Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 197 Hüküm no: 190 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eski bir sefineyle içindeki eşyaların dörtte bir hissesine sahip Aslan v. Dimitri’nin ölümüyle beytülmale kalan hissesinin Mustafa Çelebi b. İbrahim’e satıldığı Mahrûse-i Galata İskelesi’nden Eski Yağkapanı İskelesi’nde merbûta örf-i mellâhînde Volik demeğle ma‘rûfe köhne sefîne ve köhne bisât-ı lâzimesinden bir sagīr kazgan ve bir tüfeng ve iki balta ve üç lenger demir ve üç gomana ve dört isparçıne ta‘bîr olunur âlât ve yedi kürek ve dört sagīr ve kebîr yelken ve makaralar ve âlât parçalarından dört sehimden iki sehmi el-Hâc Ali b. Mehmed’in ve bir sehmi Molla Osman b. Mustafa nâm kimesnenin ve bir sehmi A[n]talyalı Aslan v. Dimitri v. Yani nâm zimmînin mülkleri olup ve mezbûr Aslan bundan akdem bilâ vâris-i ma‘rûf hâlik olmağla sefîne-i mezbûre ve âlât-ı lâzimesinden olan rub‘ hissesi taraf-ı beytü’l-mâle âid olduğu lede’ş-şer‘i’l-enver zâhir ve mukarrer oldukdan sonra mahrûse-i mezbûre ve tevâbi‘inde voyvoda ve beytü’l-mâl emîni olan fahrü’l-eşbâh el-Hâc Ahmed Ağa b. Mehmed tarafından umûr-ı beytü’l-mâli rü’yete vekîl-i müsecceli olan Murad Ağa b. Mehmed meclis-i şer‘de işbu râfi‘u’l-vesîka Mustafa Çelebi b. İbrahim nâm kimesne mahzarında bi’l-emâne ikrâr ve takrîr-i kelâm edip hâlik-i mezbûr Aslan’ın sefîne-i mezbûre ve âlât-ı lâzımesinde olan rub‘ hissesi mukaddemâ taraf-ı beytü’l-mâlden Münadi Ahmed Çelebi yediyle bey‘a arz ve dört ay mütevâliyeten mecma‘-ı nâs olan mahallerde beyne’t-tâlibîn nidâ ve müzâyede olundukda hisse-i mezbûre mezbûr Mustafa Çelebi üzerinde kırk guruşda karâr edip ve ziyâde ile tâlib-i âharı zuhûr etmemeğle hâlâ ben sefîne-i mezbûre ve âlât-ı lâzımesinde olan rub‘ hisse-i merkūmeyi mersûm Mustafa Çelebi’ye kırk guruşa taraf-ı beytü’l-mâlden bâtten bey‘ u teslîm eylediğimde ol dahi ber-vech-i muharrer iştirâ ve kabûl eyledikden sonra semeni olan meblağ-ı mezbûr kırk guruşu mezbûr Mustafa Çelebi yedinden bi’l-emâne alıp kabz eyledim ba‘de’l-yevm hisse-i mezbûre mezbûr Mustafa Çelebi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ aşer min-Şevvâli’l-mükerrem sene 1137. Şuhûdü’l-hâl: Mâ’î Mustafa Reis kethudâ, Mehmed Beşe b. Hasan, Mehmed Beşe b. Abdullah, el-Hâc Mustafa b. el-Hâc Hasan, Molla Halil b. Eyüb, Salih Bey.