Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 198 Hüküm no: 191 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Hasan’ın boşandığı kocası İbrahim Beşe b. Halil’den alacağı olan nafaka ve mehirine karşılık borçlarını ödediği Mahrûse-i Galata muzâfâtından kasaba-i Fındıklı’da el-Hâc Receb mahallesinde sâkine Fâtıma bt. Hasan nâm hâtun zâtı ba‘de’t-ta‘rîfi’ş-şer‘î mahfil-i şer‘de zevc-i mutallıkı işbu râfi‘u’l-vesîka İbrahim Beşe b. Halil nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr İbrahim Beşe hâlâ beni tatlîk etmeğle zimmetinde mütekarrır ve ma‘kūdün aleyh olan bin üç yüz akçe mehr-i mü’eccelim ile nafaka-i iddet ve me’ûnet-i süknâm için bi’t-terâzî ta‘yîn olunan dört yüz kırk akçe ve zevcim mezbûrun firâşından hâsıla ve benden mütevellide bi-hükmi’l-hıdâne hacr ve terbiyemde olan yedi yaşında üç aylık sagīre kızım Rukiye’nin dokuz yaşını tekmîl edinceye değin yevmî ikişer para nafaka-i mu‘ayyenesinden yirmi aylık nafakalı üç bin yedi yüz seksen akçe ki cem‘an beş bin beş yüz yirmi akçeyi zevcim mezbûrun kefâletiyle bir kimesneye bin dokuz yüz yirmi akçe ve Rabia Hâtun’a sekiz yüz kırk akçe ve Fâtıma Hâtun’a dokuz yüz altmış akçe ve Abdi Beşe’ye yedi yüz yirmi akçe ve Hâce Hâtun’a sekiz yüz kırk akçe ve Fındıkcı hâtununa iki yüz kırk akçe ki deynim olan cem‘an beş bin beş yüz yirmi akçeye takās eylediğimde ol dahi ber-vech-i muharrer mukāssa ve kabûl etmeğin meblağ-ı mezbûr beş bin beş yüz yirmi akçeyi bâlâda tahrîr olunan dâyinlerime edâya mezbûr İbrahim Beşe’ye emr eylediğimde ol dahi ber-vech-i muharrer edâya ba‘de’t-ta‘ahhüd hukūk-ı zevciyyete ve kızım sagīre-i mezbûre Rukiye’nin nafaka ve târih-i vesîkaya gelince beynimizde cereyân eden sâir ahz u i‘tâya müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Şevvâli’l-mükerrem sene 1137. Şuhûdü’l-hâl: Ahmed Efendi b. Süleyman, Süleyman Efendi b. Osman, Ali Beşe b. Mustafa, Mustafa Beşe b. Mehmed, İbrahim b. Muharrem.