Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 198 Hüküm no: 192 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Beşe b. Mustafa’nın kendisini yaralayan ve eşyasını gasbeden el-Hâc Mustafa ve Sıracalı Süleyman ile sulh olduğu Mahrûse-i Galata muzâfâtından kasaba-i Tophane’de Muhyiddin Efendi mahallesinde sâkin Abdülkādir Beşe b. Mustafa mahfil-i şer‘de işbu râfi‘u’l-vesîka Moskov Yasakcısı el-Hâc Mustafa b. Abdurrahman b. Abdullah ve Nemçe Yasakcısı Sıracalı Süleyman Beşe b. Mustafa taraflarından ibrâ-yı câi’z-zikri tasdîke vekîlleri olduğu es-Seyyid Mehmed b. es-Seyyid Mustafa ve Ahmed Beşe b. Yusuf şehâdetleriyle şer‘an sâbit olan Mustafa Beşe b. İbrahim mahzarlarında ikrâr ve takrîr-i kelâm edip müvekkilân-ı merkūmân el-Hâc Mustafa ve Sıracalı Süleyman yedimde olan hüccet-i şer‘iyye mantûkunca târih-i kitâbdan on beş gün mukaddem menzilime giderken Galatasarayı hâricinde vâki‘ Su terâzisi kurbünde kabîl-i mağribde önüme çıkıp merkūm el-Hâc Mustafa amden bi-gayrı hakkın beyaz kabzalı bıçak ile beni üst ve alt dudaklarımdan ve sol memem üzerinden darb ve cerh ve merkūm Sıracalı Süleyman mâ’î çuka binişimi alıp ikisi dahi firâr etmeleriyle ben dahi müvekkilân-ı merkūmânı zâbitleri ma‘rifetiyle ahz ve husûs-ı mezbûru hâkim-i muvakkı‘-ı a‘le’l-kitâb huzûrunda merkūmândan ba‘de’d-da‘vâ ve’l-inkâr ve’l-isbât müvekkilân-ı merkūmân el-Hâc Mustafa ve Sıracalı Süleyman’ı habs etdirmiş idim el-hâletü hâzihî beynimize muslihûn tavassut edip beni cerh-i mersûm ile zikr olunan çuka biniş da‘vâlarından müvekkilân-ı merkūmân ile [27a] otuz yedi buçuk guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i mersûmu müvekkilân-ı merkūmân el-Hâc Mustafa ve Sıracalı Süleyman yedlerinden tamâmen alıp kabz eylediğimden sonra ben cerh-i mezbûra ve mâ yahdesü anhuya ve zikr olunan mâ’î çuka binişe müte‘allika âmme-i de‘âvî ve eymân ve muhâsamâtdan müvekkilân-ı merkūmânın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde onlar dahi bana medfû‘ları olan bedel-i sulh-i mezbûra müte‘allika da‘vâdan kezâlik benim zimmetimi ibrâ ve ıskāt eylediler dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Şevvâli’l-mükerrem sene 1137. Şuhûdü’l-hâl: Mustafa b. Mehmed, Ali Çelebi b. Abdullah, Osman b. Ya‘kub, Mehmed Beşe b. Hüseyin, es-Seyyid Hüseyin b. es-Seyyid Abdullah, Usta Mehmed b. İbrahim, İbrahim b. Muharrem, Halil Çelebi b. Mustafa.