Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 199 Hüküm no: 193 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir Beşe b. Mustafa’nın mâ’î çukasını gasbeden Sıracalı Süleyman’ın çukayı iade etmesi gerektiği Mahrûse-i Galata hâricinde Muhyiddin Efendi mahallesinde sâkin işbu râfi‘u’l-vesîka Abdülkādir Beşe b. Mustafa mahfil-i şer‘de Moskov Yasakcısı el-Hâc Mustafa b. Abdurrahman ve Nemçe Yasakcısı Sıracalı Süleyman b. Mustafa mahzarlarında ikrâr ve takrîr-i kelâm edip târih-i kitâbdan bir hafta mukaddem Galatasaray hâricinde vâki‘ Su terâzisi kurbünde kābil-i mağribde menzilime giderken merkūmân el-Hâc Mustafa ve Sıracalı Süleyman önüme çıkıp mezbûr el-Hâc Mustafa amden bi-gayrı hakkın beyaz kabzalı bıçak ile beni üst ve alt dudaklarımdan ve sol mememin üzerinde darb ve cerh edip ve merkūm Sıracalı Süleyman Beşe dahi mâ’î çuka binişimi alıp firâr etmeleriyle hâlâ merkūmândan suâl olunup mûceb-i şer‘îsi icrâ olunmak murâdımdır dedikde gıbbe’s-suâl ve akībe’l-inkâr ve eseri talebi’l-beyyine udûl-i ricâl-i Müslimînden olup mahalle-i merkūmede sâkin Mustafa Çelebi b. Abdullah ve Hoca Ali mahallesinde sâkin <> Mehmed Beşe b. Hüseyin ve Pürtelaş Hasan mahallesinde sâkin Musa Beşe b. Mustafa nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müdde‘î-i mezbûr Abdülkādir Beşe ber-vech-i muharrer târih-i vesîkadan bir hafta mukaddem Galatasarayı hâricinde Su terâzisi kurbünde kabîl-i mağribde menziline giderken işbu merkūmân el-Hâc Mustafa ve Sıracalı Süleyman Beşe bizim huzûrumuzda müdde‘î-i mezbûrun önüne çıkıp mezbûr el-Hâc Mustafa amden bi-gayrı hakkın beyaz kabzalı bıçak ile müdde‘î-i mezbûr Abdülkādir’i üst ve alt dudaklarından ve sol meme üzerinden darb ve cerh eyleyip ve mezbûr Sıracalı Süleyman Beşe dahi müdde‘î-i mezbûrun mâ’î çuka binişini alıp kabz edip ikisi dahi firâr eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın cerh-i mezkûrun mûcibi ber-i tâmma tevkīf olunup ve zikr olunan mâ’î çuka binişi dahi müdde‘î-i mezbûra teslîme merkūm Sıracalı Süleyman Beşe’ye tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-Şevvâli’l-mükerrem sene 1137. Şuhûdü’l-hâl: Mustafa Çelebi b. Abdülkādir, Mehmed Çelebi b. İbrahim, Ahmed Çelebi b. Mustafa, İbrahim b. Mehmed, Süleyman b. Ali, Mustafa b. Ali, Ahmed b. Mustafa, İbrahim b. Muharrem.