Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 200 Hüküm no: 194 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Maturya bt. Yamandi’nin oğlu Hürmüz v. Yani’ye nafaka ödemesinin meşru olmadığı Mahmiye-i İstanbul’da Fenerkapısı’nda sâkine Marutya bt. Yamandi nâm Nasrâniye mahfil-i şer‘de varilci tâifesinden kebîr oğlu işbu hâmilü’r-rakīm Hürmüz v. Yani nâm zimmî muvâcehesinde üzerine da‘vâ ve takrîr-i kelâm edip ben fakīre ve muhtâce olup bir vechile kendimi infâk ve iksâya kudretim olmamağla oğlum merkūm Hürmüz üzerine kıbel-i şer‘den kadr-i kifâye nafaka ve kisve bahâ farz ve takdîr olunması murâdımdır dedikde gıbbe’s-suâl merkūm Hürmüz cevâbından merkūme Marutya’nın zevci olup kendüyü infâk ve iksâ eylediğinden mâ‘adâ kendinin zimem-i nâsda vâfir akçesi olmağla her vechile ihtiyâcdan berî olup gaybe olduğunu iddi‘â edip ve hâl minvâl-i meşrûh üzere olduğunu merkūmenin keyfiyet-i ahvâline vukūfları olan varilciler kethudâsı Tanaş v. Lefter ve Yorgi v. Dino ve Anton v. Yorgi ve Sotri v. Franko ve Nikola v. Marine nâm bî-garaz zimmîler alâ-tarîki’ş-şehâde haber verip ve zimmiyyûn-ı merkūmûnun haberleri üzere müdde‘iyye-i merkūme için oğlu merkūm Hürmüz üzerine nafaka farz ve takdîr olunması meşrû‘ olmayıp mûcebiyle müdde‘iyye-i merkūme oğlu merkūm Hürmüz’e bî-vech mu‘ârazadan men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî aşer min-Şevvâli’l-mükerrem sene 1137. Şuhûdü’l-hâl: Serbölük İbrahim Çelebi, Serbölük Halil Çelebi, İbrahim b. Mustafa, Mustafa b. Ahmed, Ali b. Ahmed, Mehmed b. Ahmed.