Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 201 Hüküm no: 195 Orijinal metin no: [27a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskarlato v. Yorgaki’nin İngiliz Tercüman Yorgaki v. Petraki’den bey‘ bi’l-istiğlâl yoluyla ödünç verdiği parayı geri aldığı Husûs-ı âti’z-zikrin mahallinde ketb ü tahrîri iltimâs olunmağın savb-ı şer‘i’l-enverden mevlânâ Halil Efendi b. Hüseyin me’zûnen bi’l-ketb irsâl olunup ol dahi mahrûse-i Galata’da gümrük kurbünde vâki‘ Mustafa Ağa Hânı’nda sâkin İngiliz tüccârlarından Pompertem v. Pompertem nâm müste’menin odasına varıp zeyli vesîkada muharrerü’l-esâmî Müslimîn huzûrunda akd-i meclis-i şer‘-i nebevî eyledikde tabîb tâifesinden İskarlato v. Yorgaki meclis-i ma‘kūd-ı mezbûrda İngiliz tercümânlarından işbu hâmilü’r-rakīm Yorgaki v. Petraki muvâcehesinde ikrâr ve takrîr-i kelâm edip tercümân-ı merkūm Yorgaki 1136 senesi Zilhicce’sinin ikinci günü bâ-hüccet-i şer‘iyye yedinde mülkü olup mahrûse-i mezbûre hâricinde Sarı Lütfi mahallesinde Dörtyolağzı nâm mahalde vâki‘ bir tarafdan Drako v. Yani mülkü ve bir tarafdan mezbûr Yorgaki’nin karındaşı Tercümân Andornaki mülkü ve iki tarafdan tarîk-i âm ile mahdûd ulyâda cedîd bir cihân-nümâ ve iki cedîd oda ve bir sofa ve bir camlı dîvânhâne ve bir kenîf ve mağsel vüstâda beş bâb atîk ve cedîd odalar ve üç dehlîz ve bir matbah ve iki kenîf süflâda üç mahzen ve bir sahrınc ve bi’r-i mâ ve kenîf ve mahtab ve ma‘lûmü’l-mikdâr bahçeyi müştemil mülk menzilini iki bin iki yüz elli guruşa bi-tarîki’l-istiğlâl bana bey‘ u teslîm ben dahi ber-vech-i muharrer iştirâ ve tesellüm ve kabûl eylediğimden sonra menzil-i merkūmu ba‘de’t-tahliyeti’ş-şer‘iyye ve’t-tekābuzi’l-mer‘î târih-i mezbûrdan iki sene tamâmına dek senede ikişer yüz guruşdan cem‘an dört yüz guruşa olmak üzere tercümân-ı merkūma îcâr ve teslîm ol dahi ber-minvâl-i muharrer istîcâr ve tesellüm ve kabûl eylemiş idi el-hâletü hâzihî tercümân-ı mersûm Yorgaki asl-ı mâl-ı merkūm iki bin iki yüz elli guruşu ile menzil-i mezbûrun târih-i kitâba gelince müctemi‘ olan ma‘lûmü’l-mikdâr ücret-i lâzimesini bana edâ ve teslîm edip ben dahi yedinden tamâmen alıp kabz eyleyip menzil-i merkūmu istiğlâliyetden fekk ve tercümân-ı merkūma teslîm eylediğimde ol dahi ahz u kabz ve tesellüm eyledi dedikde gıbbe’t-tasdîki’ş-şer‘î vâki‘-i hâli mevlânâ-yı mezkûr mahallinde ketb ü tahrîr ve ma‘an ba‘s olunan çukadâr el-Hâc Mehmed b. Mehmed ve muhzır Mehmed b. Ahmed ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-Şevvâli’l-mükerrem sene 1137. Şuhûdü’l-hâl: Serrac el-Hâc Mehmed b. Hasan, Yağcı el-Hâc Hüseyin b. Abdullah, Ali Çelebi b. Mehmed, Çukadâr el-Hâc Mehmed, Muhzır Mehmed b. Ahmed, Pavlov v. Corci, Yeraki v. Palloga, Anton v. Marki, Lorinco v. Espekli, Hristo Sakomi v. Yanaki, Tabib Nikola v. Marit.