Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 203 Hüküm no: 197 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donik v. Piros’un kendisini yaralayan Mehmed Bey b. Ahmed ile sulh olduğu Vilayet-i Anadolu’da Divriği kazâsına tâbi‘ Arşişon nâm karye sükkânından Donik v. Piros v. Kantos nâm Ermeni tarafından zikri âtî sulh ve ibrâya vekîl olduğu Ali b. Mustafa ve Ebûbekir b. Himmet nâm kimesneler şehâdetleriyle şer‘an sâbit olan Sahak v. Piros nâm Ermeni ve yine karye-i mezbûre sükkânından olup kendi tarafından asil Vasdar v. Arzuman v. Ohan ve Vartan v. Murat v. Vartan ve Asan v. Hacik v. Arsiya ile sâir ma‘lûmü’l-esâmî ve mahzûrü’l-eşhâs Ermeniler tarafından kezâlik ibrâ-i câi’z-zikre vekîl olduğu şâhidân-ı mezbûrân şehâdetleriyle sâbit olan Mardiros v. Bağdasar nâm Ermeni meclis-i şer‘de sâbıku’z-zikr Divriği kasabası sükkânından olup hâlâ mahrûse-i Galata’da Câmi‘-i Cedîd mahallesinde sâkin işbu râfi‘u’l-vesîka Mehmed Bey b. Ahmed nâm kimesne mahzarında her biri bi’l-asâle bi’l-vekâle ikrâr ve takrîr-i kelâm edip mezbûr Mehmed Bey târih-i kitâbdan bir sene mukaddem gāib-i merkūm Donik’i karye-i mezbûrede sağ uyluğundan bıçak ile amden bi-gayrı hakkın darb ve cerh ve firâr etmeğle gāib-i merkūm Donik mezbûr Mehmed Bey’i ahz ve mûceb-i şer‘ini da‘vâ için keyfiyet-i muharrereyi kazâ-i mezbûre vâlisine i‘lâm eyledikde vâli dahi mezbûr Mehmed Bey’i siz kaçırdınız deyü karye-i mezbûre ahâlîsini tecrîm etmeğin biz dahi husûs-ı mezbûru mezbûr Mehmed Bey’den ba‘de’d-da‘vâ ve’l-inkâr müdde‘âlarımızı isbâta adem-i kudretimizden nâşî mezbûr Mehmed Bey’i tahlîf sadedinde olmuş idik el-hâletü hâzihî beynimize muslihûn tavassut edip bizi da‘vâ-yı mezkûremizden mezbûr Mehmed Bey ile an-inkâr fedâen li’l-yemîn kırk guruş üzerine inşâ-i akd-i sulh eylediklerinde biz dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr kırk guruşu mezbûr Mehmed Bey yedinden tamâmen ahz u kabz eylediğimizden sonra cerh-i mezbûra ve mâ yahdesü anhuya ve kazâ-i mezbûre vâlisine verdikleri kalîl ve kesîr cerîmeye müte‘allika âmme-i da‘vâ ve asâlet ve vekâletimiz hasebiyle mezbûr Mehmed Bey’in zimmetini ibrâ ve ıskāt eylediğimizde ol dahi bedel-i sulh olan meblağ-ı mezbûr kırk guruşa müte‘allika âmme-i da‘vâdan bizim ve karye-i mezbûre ahâlîsinin zimmetlerini ibrâ ve ıskāt eyledi dediklerinde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Şevvâli’l-mükerrem sene 1137. Şuhûdü’l-hâl: Molla İbrahim b. Ali, Molla Mehmed b. Hüseyin, Mehmed b. Bâli, Halil b. Musa, Ahmed Efendi b. Ali, Hüseyin Çelebi b. Salih, Ali b. Mustafa, Ebûbekir b. Himmet, İbrahim b. Muharrem, Arşe v. Arakil, Aleksan v. Mankasar, Gabril v. Donik, Aram v. Aslan, Köpik v. Donil ve gayrühum.