Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 204 Hüküm no: 198 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerime Hatun bt. Mustafa’nın boşandığı kocası Mehmed b. Hüseyin’den hamile olduğu çocuğu için nafaka takdir olunduğu <> Mahrûse-i Galata tevâbi‘inden kasaba-i Tophane’de İlyas Çelebi mahallesinde sâkine olup zâtı ta‘rîf-i şer‘î ile mu‘arrefe olan işbu râfi‘atü’l-vesîka Kerime Hâtun bt. Mustafa nâm hâtun meclis-i şer‘-i şerîf-i nebevîde takrîr-i kelâm ve ta‘bîr ani’l-merâm edip zevcim olup bundan akdem beni tatlîk eden gāib ani’l-meclis Mehmed b. Hüseyin nâm kimesnenin firâşından hâsıl hâlâ batnımda mevcûd hamlim olmağla vaz‘-ı haml edinceye değin benim için gāib-i mezbûr üzerine kadr-i kifâye nafaka bahâ farz ve takdîr olunmak matlûbumdur dedikde hâkim-i muvakkı‘-ı a‘la’l-kütüb -rafa‘a kadrahû mevlâhü’l-vahhâb- efendi dahi mezbûre Kerime Hâtun için vaz‘-ı haml edinceye değin zevci gāib-i mezbûr üzerine târih-i kitâbdan beher yevm ikişer para nafaka bahâ farz ve takdîr edip meblağ-ı mefrûz-ı merkūmu nafaka vesâir levâzım-ı zarûriyyesine harc ve sarfa ve lede’z-zafer gāib-i mezbûr üzerine rücû‘a merkūme Kerime Hâtun’a izin verilmeğin. Fi’l-yevmi’s-sâdis aşer min-Şevvâli’l-mükerrem sene 1137. Şuhûdü’l-hâl: İbrahim b. Muharrem, Halil Çelebi b. Mustafa, Deli İbrahim b. Mustafa, Baba Yusuf b. Abdullah, Mustafa b. Ahmed.