Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 204 Hüküm no: 199 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Abdullah’ın eski eşi Belkıs bt. Abdullah’a küçük oğlu Abdullah’ın hissesini başkasına satmaya izin verildiği Vilâyet-i Anadolu’da Amasra Kal‘ası dâhilinde sâkine iken bundan akdem vefât eden İbrahim b. Abdullah b. Abdurrahman’ın verâseti zevce-i metrûkesi Belkıs bt. Abdullah ile sulbî sagīr oğlu Ahmed’e ve sulbîye kebîre kızları Fâtıma ve Emine’ye münhasıra olduğu lede’ş-şer‘i’l-enver zâhir ve mukarrer oldukdan sonra sagīr-i mezbûr Ahmed’in anası ve tesviye-i umûrunu rü’yete kıbel-i şer‘den mansûbe vasiyesi işbu râfi‘atü’l-vesîka mezbûre Belkıs meclis-i şer‘de bi’l-vesaye takrîr-i kelâm ve ta‘bîr ani’l-merâm edip zevcim müteveffâ-yı mezbûrun terekesinden olup mârrü’z-zikr Amasra Kal‘ası dâhilinde vâki‘ lede’l-ahâlî ve’l-cîrân ma‘lûmü’l-hudûd bir bâb mülk menzilden gayri ism-i mâl ıtlâk olunur nesnesi olmayıp verese-i kitâb-ı menzil-i mezbûru bey‘ murâd etmeleriyle sagīr-i mezbûrun hissesini ifrâz mümkün olmadığından mâ‘adâ diyâr-ı âharda olmağla hâsıl-ı harcına vefâ etmeyip ve sagīr-i mezbûrun nafakaya dahi zarûreti olmağla menzil-i mezbûrda olan hissesini semen-i misli ile bey‘ olunmak sagīr-i mezbûr hakkında her vechile evlâ ve enfa‘ olmağın vâki‘-i hâl ehl-i vukūf-ı Müslimînden suâl ve sagīr-i mezbûrun menzil-i mezbûrda olan hissesini semen-i misli ile âhara bey‘a kıbel-i şer‘den bana izin verilmek matlûbumdur deyü iş‘âr ve hâl minvâl-i muharrer üzere olduğu zeyl-i vesîkada muharrerü’l-esâmî Müslimîn ihbârlarıyla zâhir ve nümâyân olmağın hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- efendi hazretleri dahi sagīr-i mezbûrun menzil-i mezkûrda olan hissesini semen-i misli ile âhara bey‘a vasiye-i mezbûre Belkıs Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis aşer min-Şevvâli’l-mükerrem sene 1137. Şuhûdü’l-hâl: Ahmed Çelebi b. Ali, Mehmed b. Ali, Mehmed b. Ahmed, İbrahim b. Abdullah, Ahmed Bey b. Receb, Halil Reis b. Abdurrahman, Bağdâdî Ahmed Reis, Kaygusuzoğlu, Mustafa b. Abdullah.