Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 205 Hüküm no: 200 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Abdullah’ın varislerinin menzillerini Osman b. Bayram’a sattıkları Vilâyet-i Anadolu’da Amasra Kal‘ası dâhilinde sâkin iken bundan akdem vefât eden İbrahim b. Abdullah b. Abdurrahman’ın verâseti zevce-i metrûkesi Belkıs bt. Abdullah ile sulbî sagīr oğlu Ahmed’e ve sulbîye kebîre kızları Fâtıma ve Emine’ye münhasıra tashîh-i meseleleri otuz iki sehimden olmağla sihâm-ı mezbûreden dört sehmi mezbûre Belkıs’a ve on dört sehmi sagīr-i mezbûr Ahmed’e ve yedişer sehmi mezbûretân Fâtıma ve Emine’den her birine isâbet eyleyip mezbûre Belkıs oğlu sagīr-i mezbûr Ahmed’in tesviye-i umûrunu rü’yete kıbel-i şer‘de mansûbe vasîsi olduğu lede’ş-şer‘i’l-enver zâhir ve mukarrer oldukdan sonra mezbûretân Fâtıma ve Emine mahfil-i şer‘de işbu râfi‘u’l-vesîka Osman b. Bayram nâm kimesne mahzarında her biri ikrâr ve takrîr-i kelâm edip babam müteveffâ-yı mezbûrun terekesinden olup mârrü’z-zikr Amasra Kal‘ası dâhilinde vâki‘ bir tarafdan Mustafa Reis menzili ve bir tarafdan Ali Çelebi menzili ve bir tarafdan Dizdâr Mehmed Ağa menzili ve taraf-ı râbi‘den tarîk-i âm ile mahdûd ve fevkānî bir bâb oda ve tahtında bir ahur ve bir mikdâr bahçe ve kenîf ve bi’r-i mâʼî müştemil mülk menzilden tashîh-i mezbûr üzere bize isâbet eden yedişer sehm hisse-i şâyi‘amızı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Osman’a ikişer bin üçer yüz elli dokuzar akçeye her birimiz bey‘ u temlîk ve teslîm ve mahallinde kabz u tasarrufa taslît edip ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûru her birimiz mezbûr Osman yedinden tamâmen ahz u kabz eyledik dediklerinde gıbbe’t-tasdîki’ş-şer‘î merkūme Belkıs Hâtun dahi meclis-i mezbûrda işbu sâhibü’l-kitâb mezbûr Osman mahzarında bi’l-asâle ve bi’l-vekâle ikrâr ve takrîr-i kelâm edip müteveffâ-yı mezbûrun menzil-i mezbûrdan gayri terekesi olmayıp ve menzil-i mezbûru verese-i kibâr âhara bey‘ murâd eylediklerinde sagīr-i mezbûrun hissesini ifrâz mümkün olmadığından mâ‘adâ diyâr-ı âharda olmağla hâsıl-ı harcına vefâ etmeyip ve sagīr-i mezbûrun nafakaya dahi zarûreti olmağla sagīr-i mezbûrun hissesini dahi bey‘a kıbel-i şer‘den me’zûn olduğum cihetle tashîh-i mezbûr üzerine menzil-i mezbûrda olan dört sehm hissem ile sagīr-i mezbûrun on dört sehm hissesini mezbûr Osman’a tarafeynden îcâb ve kabûlü hâvî bey‘-i bâtt-ı sahîh-i şer‘î ile altı bin altmış altı akçeye bey‘ u temlîk ve mahallinde kabz ve tasarrufa taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûru bi’l-asâle ve bi’l-vesaye mezbûr Osman yedinden tamâmen ahz u kabz eyledim ba‘de’l-yevm menzil-i mezbûr mezbûr Osman’ın mülk-i müşterâsı olmuşdur keyfe mâ yeşâ ve tahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâlis aşer min-Şevvâli’l-mükerrem sene 1137. Şuhûdü’l-hâl: es-Sâbikūn.