Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 206 Hüküm no: 201 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Hasan b. Mustafa’nın damadı Mağribli Ahmed Çelebi’nin cariyeleri Ayşe ve Mebruka’nın ücretlerine ilaveten kızı Hadice Hatun’un nafaka alacağını tahsil ettiği Mahrûse-i Galata dâhilinde Okcu Musa mahallesinde sâkine Hadice nâm hâtunun babası ve tarafından ibrâ-i câi’z-zikri ikrâra vekîli olduğu zât-ı mezbûreyi ma‘rifet-i şer‘iyye ile ârifân Müezzin Molla Ahmed b. Mahmud Efendi ve Hüseyin Efendi b. Hasan şehâdetleriyle mahzar-ı hasm-ı câhidde şer‘an sâbit ve vekâlete hükm-i şer‘î lâhik olan el-Hâc Hasan b. Mustafa mahfil-i şer‘de kızı müvekkile-i mezbûre Hadice Hâtun’un zevci işbu râfi‘u’l-vesîka Mağribli Ahmed Çelebi b. Musa mahzarında vekâleten ikrâr ve takrîr-i kelâm edip dâmâdım mezbûr Ahmed Çelebi târih-i kitâbdan altı sene mukaddem diyâr-ı âhara gidip kızım mezbûreye nafaka cinsinden bir nesne komayıp ve irsâl dahi etmemeğle kızım mezbûre Hadice Hâtun dahi yedimde olan nafaka hücceti mantûkunca kendüye ve câriye vesâir hizmetinde olanların nafaka ve kisveleri için zevci mezbûr Ahmed Çelebi üzerine yevmî onar para farz ve takdîr etdirmeğle kızım müvekkile-i mezbûre Hadice Hâtun’un nafaka-i mefrûz-ı müstedânesinden târih-i vesîkaya gelinceye altı senede zevci mezbûr üzerinde beş yüz kırk guruş hakkı müctemi‘ olmuş idi binâen aleyh dâmâdım mezbûr Ahmed Çelebi dahi bundan akdem yedinden iştirâ ve kabz eylediğim ma‘lûmetü’l-evsâf Âişe ve Mebruka nâm iki re’s siyah câriye semenlerinden zimmetimde hakkı olan iki yüz kırk guruşu üçümüz bir meclisde olduğumuz hâlde benden kızım müvekkile-i mezbûreye havâle etmeğle kızım mezbûre dahi meblağ-ı mefrûz-ı mezkûr beş yüz kırk guruşun mikdâr-ı mezkûruna mahsûb ve takās eylemek üzere semen-i merkūm iki yüz kırk guruşu yedimden ahz u kabz ve bâkī kalan üç yüz guruşu dahi mezbûr Ahmed Çelebi yedinden ber-vech-i nakd tamâmen alıp kabz eylediğinden sonra kızım müvekkile-i mezbûre Hadice Hâtun’a beş yüz kırk guruş nafaka-i mefrûze-i mezkûresine müte‘allika da‘vâdan zevci mezbûr Ahmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyleyip ol dahi zikirleri sebk eden iki re’s siyah câriyeye ve kızım mezbûreye medfû‘u olan meblağ-ı mezbûr üç yüz guruşa müte‘allika âmme-i da‘vâdan kezâlik benim ve kızım mezbûre Hadice Hâtun’un zimmetimizi ibrâ-i âmm-ı kātı‘u’n-nizâ‘la ibrâ ve ıskāt eyledi dedikde mezbûr Ahmed Çelebi dahi kāinanası vekîli mezbûr el-Hâc Hüseyin ikrâr-ı meşrûhunda vicâhen ve şifâhen tahkīk ve tasdîk etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin aşer min-Şevvâli’l-mükerrem sene 1137. Şuhûdü’l-hâl: Hüseyin Efendi b. Hasan, Müezzin Molla Ahmed b. Mahmud Efendi, Arusi Mustafa Efendi, Ahmed Efendi b. Süleyman, Mukayyid Molla İbrahim Efendi.