Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 792 Hüküm no: 1036 Orijinal metin no: [123a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha Hatun’un, Ahmed Çelebi b. Mehmed’den muhâlaa yoluyla boşandığı Mahmiye-i İstanbul’da Tahtaminâre mahallesinde sâkine fahrü’l-muhadderât Sâliha Hâtun’un babası ve tarafından husûs-ı âti’l-beyâna vekîl olduğu mahalle sükkânından olup mezkûrenin zâtını ma‘rifet-i şer‘iyye ile ârifân olan Ahmed Efendi b. Şaban el-İmâm nâm kimesneler şehâdetleriyle şehâdetleri [vekâleti] şer‘an sâbit olan fahrü’l-akrân Mustafa Çavuş b. Abdülmennân meclis-i şer‘-i hatîr-i lâzımü’t-tevkīrden müvekkile-i mezbûrenin zevci bâ‘isü’l-kitâb Ahmed Çelebi b. Mehmed mahzarında bi’l-vekâle ikrâr ve takrîr-i kelâm edip müvekkilem mezbûre Sâliha zevci Ahmed Çelebi zimmetinde mütekarrir ve ma‘kūdun-aleyh olan on altı bin akçe mehr-i müecceli ve nafaka-i iddet-i ma‘lûmesi üzerlerine ve me’ûnet-i süknâsı dahi kendi üzerine olmak üzre merkūm Ahmed Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra zevciyyete müte‘allika cemî‘ da‘vâdan her biri âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Receb Ağa b. Mustafa, Receb Çavuş b. Mustafa el-Mübâşir, Mustafa Çelebi b. Abdi, Veli Beşe b. Abdi, Ahmed Halîfe b. ( ) el-Müezzin.