Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 207 Hüküm no: 202 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Reis b. Halil’in Murteza b. Ali ve Osman b. Hamza’ya olan borcunu kefili olan oğlu Ahmed Beşe’nin ödeyeceği El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîne-i Galata -gufira lehû-. Mellâh tâifesinden ibşu râfi‘u’l-vesîka Murteza b. Ali ve Osman b. Hamza nâm kimesneler mahmiye-i İstanbul’da hazret-i sadr-ı a‘zamîde ma‘kūd meclis-i şer‘de Ahmed b. Mehmed Reis nâm kimesne mahzarında her biri üzerine da‘vâ ve tasvîr-i müdde‘â edip târih-i kitâbdan sekiz ay mukaddem mezbûr Ahmed Beşe’nin babası gāib ani’l-beled mezbûr Mehmed Reis b. Halil b. Abdullah’a İsmail kasabasında râkib olduğu sefînesinde iki yüz guruşu benim ve yüz on bir guruşu mezbûr Osman’ın olup cedîd zolata olmak üzere mâlımızdan cem‘an üç yüz on bir guruş ikrâz ve teslîm edip ol dahi ber-vech-i muharrer yedimizden iktirâz ve tesellüm eyledikden sonra gāib-i mezbûrun oğlu mezbûr Ahmed Beşe meblağ-ı mecmû‘-ı merkūm üç yüz on bir guruşa <> tarafeynden emr ü kabûlü hâviye kefâlet-i şer‘iyye ile kefîl ve dāmin olmağın suâl olunup meblağ-ı mecmû‘-ı mezbûru kefâletine binâen bize edâya tenbîh olunması murâdımızdır dediklerinde gıbbe’s-suâl mezbûr Ahmed Beşe cevâbında zeyl-i merkūmu ikrâr lâkin meblağ-ı mecmû‘-ı merkūma kefâlet-i meşrûhasını inkâr edicek müdde‘iyân-ı mezbûrân Murteza ve Osman’dan da‘vâ-yı mezkûrelerine muvâfıka beyyine taleb olundukda udûl-i ricâl-i Müslimînden olup sefîne reîslerinden Kamiloğlu sefînesinde sâkin Ahmed b. el-Hâc Mahmud ve Çobanoğlu sefînesinde sâkin diğer Ahmed b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ gāib-i merkūm Mehmed Reis’in ber-vech-i muharrer müdde‘iyân-ı mezbûrân Murteza ve Osman Beşe’den iktirâz ve tesellüm eyleyip ol vechile zimmetinde mezbûrâna zimmetinde edâsı lâzım deyni olan meblağ-ı mecmû‘-ı merkūm üç yüz on bir guruşa gāib-i mezbûrun oğlu işbu mezbûr Ahmed Beşe târih-i i‘lâmdan sekiz ay mukaddem İsmail kasabasında râkib olduğu sefînesinde bizim huzûrumuzda tarafeynden emr u kabûlü hâviye kefâlet-i şer‘iyye ile kefîl ve dāmin oldu biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle meblağ-ı mecmû‘-ı mezbûr üç yüz on bir guruşu müdde‘iyân-ı mezbûrâna bi-hükmi’l-kefâle edâ ve teslîme mezbûr Ahmed’e tenbîh birle mâ-hüve’l-vâkı‘ bi’t-taleb ketb olundu. Fi’l-yevmi’s-sâdis aşer min-Şevvâli’l-mükerrem sene 1137. Şuhûdü’l-hâl: Halil Çelebi b. Mustafa, İbrahim b. Muharrem, Yusuf Beşe b. Abdullah, Mehmed b. Ahmed, el-Hâc Mehmed b. Mehmed.