Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 208 Hüküm no: 203 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Ömer b. Abdullah’ın müşterek oldukları mülk menzildeki hissesini kardeşi Mustafa’ya sattığı Vilâyet-i Anadolu’da Karadeniz sâhilinde Giresun kasabasında el-Hâc Hüseyin mahallesi ahâlîsinden es-Seyyid Ömer b. Abdullah nâm kimesne meclis-i şer‘de karındaşı işbu sâhibü’l-kitâb es-Seyyid Mustafa b. Abdullah nâm kimesne mahzarında ikrâr ve takrîr-i kelâm edip karındaşım mezbûr es-Seyyid Mustafa ile ale’l-iştirâki’s-seviy mülkümüz olup mahalle-i mezbûrede vâki‘ bir tarafdan el-Hâc Mehmed mülkü ve bir tarafdan Uzunoğlu Mustafa mülkü ve bir tarafdan el-Hâc Mustafa mülkü ve bir tarafdan tarîk-i âm ile mahdûd fevkānî bir bâb oda ve bir matbah ve tahtında bir bâb mahzeni müştemil mülk menzilde olan nısf hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile yirmi guruşa bey‘ u temlîk ve mahallinde kabz ve tasarrufa taslît edip ol dahi ber-vech-i muharrer iştirâ ve temellük eyledikden sonra semeni olan meblağ-ı mezbûru müşterî-i mezbûr yedinden ahz u kabz eyledim ba‘de’l-yevm menzil-i mahdûd-ı mezbûr bi-cümletin mâ yeştemilühû ve yahvîhi karındaşım mezbûr es-Seyyid Mustafa’nın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem sene 1137. Şuhûdü’l-hâl: Şarlıoğlu es-Seyyid Mustafa, Hasan Beşe b. Abdullah, es-Seyyid Mahmud b. Hasan, es-Seyyid Ali b. İbrahim, es-Seyyid Ali b. es-Seyyid Hüseyin, el-Hâc Mustafa b. Şa‘ban.