Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 209 Hüküm no: 204 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Ahmed’in berber dükkanını Ali b. Osman’a sattığı Mahmiye-i İstanbul’da Edirnekapısı dâhilinde el-Hâc Fahreddin mahallesinde sâkin İbrahim Çelebi b. Ahmed nâm kimesne meclis-i şer‘de mahrûse-i Galata muzâfâtından İstinye nâhiyesine tâbi‘ Hisâr-ı Cedîd sâkinlerinden Ali b. Osman b. Abdullah nâm kimesne tarafından ikrâr-ı âti’z-zikri tasdîka vekîl-i şer‘îsi olan işbu sâhibü’l-kitâb Musa b. Mehmed nâm kimesne mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup hisâr-ı mezbûr kurbünde vâki‘ bir tarafdan menzil-i Kovuş ve bir tarafdan Kovuşkapısı ve iki tarafdan meydan ile mahdûd hisâr-ı mezbûr câmi‘-i şerîfi arsasının senevî yüz yirmi akçe mukāta‘ası olan dört kepeng bir mülk berber dükkânımız müvekkil-i mezbûr Ali’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile kırk guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr kırk guruşu müvekkil-i mezbûr Ali yedinden bi’t-tamâm ve’l-kelâm ahz u kabz eyledim ba‘de’l-yevm dükkân-ı mahdûd-ı mezkûr bi-cemî‘i mâ yeştemilühû ve yahvîhi müvekkil-i mezbûrun mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sânî ve’l-ışrîn min-Şevvâli’l-mükerrem sene 1137. Şuhûdü’l-hâl: Topcu İsmail Çelebi b. Abdullah, el-Hâc İbrahim b. Abdullah, Çandarlı Ali b. Mustafa, Abdurrahman Efendi b. İsmail el-imâm, Davud Beşe b. İbrahim, el-Hâc Ahmed Efendi b. Mustafa, İbrahim b. Muharrem.