Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 209 Hüküm no: 205 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskerlet v. Yanaki’nin Döşemeci Tanaş’la müşterek mülkü olan bağdaki yarı hissesini Salamon v. Nito isimli Yahudi’ye sattığı Mahrûse-i Galata muzâfâtından kasaba-i Beşiktaş’da Sinan Paşa mahallesinde sâkin İskerlet v. Yanaki nâm zimmî meclis-i şer‘de işbu hâmilü’r-rakīm Salamon v. Nito nâm Yahûdi muvâcehesinde ikrâr ve takrîr-i kelâm edip akd-i âtî sudûruna değin silk-i mülkümde münselik olup kasaba-i mezbûre bağları hilâlinde vâki‘ etrâf-ı erba‘adan tarîk-i âm ile mahdûd tahmînen yirmi dönüm kürûmu mülk bağ işbu hâzır bi’l-meclis Döşemeci Tanaş nâm zimmî ile ale’l-iştirâki’s-seviy mülkümüz olmağın bağ-ı mezkûrda olan nısf hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Salamon’a yüz kırk guruşa bey‘ u teslîm edip ol dahi ber-vech-i muharrer iştirâ ve tesellüm ve kabz ve kabûl eyledikden sonra semeni olan meblağ-ı mezbûr yüz kırk guruşu müşterî-i mersûm Salamon yedinden tamâmen ahz u kabz eyledim fîmâ ba‘d bağ-ı mahdûd-ı mezbûrun nısf-ı şâyi‘i mersûm Salamon’un mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî-25 L sene 1137. Şuhûdü’l-hâl: Şarlıoğlu es-Seyyid Mustafa, Hasan Beşe b. Abdullah, es-Seyyid Mahmud b. Hasan, es-Seyyid Ali b. İbrahim, es-Seyyid Ali b. es-Seyyid Hüseyin, el-Hâc Mustafa b. Şa‘ban, Halil Çelebi b. Mustafa, İbrahim b. Mustafa ve gayrühum.