Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 210 Hüküm no: 206 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in altı sene hizmet ettiği Receb b. Yahya ile sulh oldukları Mahrûse-i Galata muzâfâtından kasaba-i Kasımpaşa’da İbâdullah mahallesinde sâkine Âişe bt. Mehmed nâm hâtun zâtı ba‘de’t-ta‘rîfi’ş-şer‘î meclis-i şer‘de işbu râfi‘u’l-vesîka Receb b. Yahya nâm kimesne mahzarında bi-tav‘ihâ ikrâr ve takrîr-i kelâm edip ücret ile hizmet eder makūlesinden olduğum cihetle ücret-i kavliniz mezbûr Receb’e târih-i kitâba gelince altı sene hizmet eylemiş idim deyü ecr-i misl da‘vâsına tasaddî eylediğimde ol dahi benim ücret ile hizmet eder makūlesinden olduğumu inkâr ve ben müdde‘âmı beyâna kādire olmayıp mezbûr Receb’i tahlîf sadedinde iken beynimize muslihûn tavassut edip mezbûr Receb ile beni ecr-i misl da‘vâsından fedâen li’l-yemîn yirmi beş guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr yirmi beş guruşu mezbûr Receb yedinden ahz u kabz eylediğimden sonra ücret-i mezbûreye ve târih-i kitâba gelince beynimizde cereyân eden husûs-ı sâire müte‘allika âmme-i da‘vâdan mezbûr Receb ile zevcesi Saliha’nın zimmetlerini ibrâ ve ıskāt edip ol dahi bedel-i sulh olan meblağ-ı mezbûr yirmi beş guruşa müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî ve’l-ışrîn min-Şevvâli’l-mükerrem sene 1137. Şuhûdü’l-hâl: Ömer b. Mustafa, Mustafa b. Abdulbâki, el-Hâc Ali b. Mehmed, Veli Beşe b. Hüseyin, es-Seyyid ( ) b. Mehmed, Mehmed b. Ahmed, Ali b. Mehmed.