Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 210 Hüküm no: 207 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakızlı İstemat v. Kostati’yi bıçakla yaralayan Mustafa Beşe b. Hasan’la sulh oldukları Mahmiye-i İstanbul’da Balıkpazarıkapısı hâricinde Bağcı sokağında vâki‘ el-Hâc Ali Hânı’nda mütemekkin Sakızlı İstemat v. Kostanti v. Dimitri nâm zimmî tarafından zikri âtî sulh ve ibrâyı ikrâra vekîl olduğu Ömer Çelebi b. Ahmed ve Mustafa Beşe b. Halil nâm kimesneler şehâdetleriyle sâbit olan akrabâsından Dimitri v. Kostantin nâm zimmî meclis-i şer‘-i hatîr-i lâzimü’t-tevkīrde Dergâh-ı âlî topcularından işbu râfi‘u’l-kitâb Mustafa Beşe b. Hasan nâm kimesne mahzarında bi’l-vekâle ikrâr ve takrîr-i kelâm edip mezbûr Mustafa Beşe târih-i kitâbdan on altı gün mukaddem dahve-i kübrâda mârrü’z-zikr Balıkpazarı İskelesi kurbünde müvekkilim merkūm İstemat’ı bıçak ile sağ dirseği yanından bi-gayrı hakkın darb ve cerh etmeğle yedimde olan i‘lâm nâtık olduğu üzere mûceb-i şer‘îsini ber-i tâm husûlüne tevkīf olunmuş idi el-hâletü hâzihî beynlerinde muslihûn tavassut edip müvekkilim merkūm İstemat’ı da‘vâ-yı mezkûresinden mezbûr Mustafa Beşe ile kırk guruş üzerine inşâ-i akd-i sulh eylediklerinde ol dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr kırk guruşu mezbûr Mustafa Beşe yedinden bi’t-tamâm ahz u kabz eylediğinden sonra cerh-i mezkûra ve mâ yahdesü anhuya müte‘allika âmme-i da‘vâdan mezbûr Mustafa Beşe’nin zimmetini ibrâ ve ıskāt eyledikde mezbûr Mustafa Beşe dahi bedel-i sulh-i mezbûr kırk guruşa müte‘allika âmme-i da‘vâdan müvekkilem merkūm İstamat’ın zimmetini ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem sene seb‘a ve selâsîn ve mi’e ve elf. Şuhûdü’l-hâl: Ahmed Beşe b. Mehmed el-mübâşir, Ömer Çelebi b. Ahmed, Mustafa Beşe b. Halil, Arnavud Mehmed Beşe, Yusuf Beşe, Sarı Hüseyin, Hatib İbrahim, Karabıçak Ahmed, Duhânî İsmail, Kahveci Mustafa Odabaşı, Terzi İbrahim, Çamaşır İbrahim, Halil Çelebi b. Mustafa b. Receb, İbrahim b. Mustafa, Mehmed b. Ahmed, Yusuf b. Abdullah.