Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 211 Hüküm no: 208 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hallac Süleyman Çelebi b. Mehmed’in vârislerinden oğlu İbrahim’in menzildeki hissesini kız kardeşi Hadice Hatun’a sattığı Husûs-ı âti’z-zikrin mahallinde ketb ü tahrîri iltimâs olunmağın savb-ı şer‘-i enverden mevlânâ Mustafa Efendi b. Hasan irsâl olunup ol dahi mahrûse-i Galata’da Emekyemez mahallesinde sâkin iken bundan akdem vefât eden Hallâc Süleyman Çelebi b. Mehmed’in hayâtında sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde müteveffâ-yı mezbûr Süleyman Çelebi’nin verâseti zevce-i metrûkesi Hanife bt. Şa‘ban nâm hâtuna ve sulbî kebîr oğlu İbrahim ve sulbiye kebîre kızları Hadice ve Rukiye ve Safiye[Hanife] nâm hâtunlara münhasıra olup ba‘dehû mezbûre Hanife dahi vefât edip verâseti anası mezbûre Hanife Hâtun’a ve li-ebeveyn karındaşları mezbûrûn İbrahim ve Hadice ve Rukiye’ye münhasıra ve tashîh-i meselesi bi-hükmi’l-münâsahati’ş-şer‘iyye dokuz yüz altmış sehimden olmağla sihâm-ı mezbûreden 148 sehmi mezbûre Hanife’ye ve dört yüz altı sehmi mezbûr İbrahim’e ve ikişer yüz üçer sehmi mezbûretân Hadice ve Rukiye’den her birine isâbet eylediği lede’ş-şer‘i’l-enver zâhir ve mütekarrır oldukdan sonra mezbûr İbrahim meclis-i ma‘kūd-ı mezbûrda kız karındaşı işbu sâhibetü’l-kitâb mezbûre Hadice Hâtun mahzarında ikrâr ve takrîr-i kelâm edip babam müteveffâ-yı mezbûr Süleyman Çelebi’nin ile’l-vefât mülkü olmağla ba‘de vefâtihî verese-i mezkûresine mevrûs olup mahalle-i mezbûrede vâki‘ bir tarafdan Hamalbaşı el-Hâc Mehmed Vakfı olan menzil ve bir tarafdan ba‘zen Hadice Hâtun menzili ve ba‘zen mezbûre Hanife Hâtun tasarrufunda olan vakıf arsa ve iki tarafdan tarîk-i âm ile mahdûd fevkānî iki bâb oda ve bir sofa ve bir kilâr ve dehlîz vüstâda bir bâb oda ve bir kilâr ve dehlîz ve kenîf ve süflâda bir harâb mağsel ve bi’r-i mâʼî müştemil işbu mu‘âyene olunan mülk menzilden tashîh-i mezbûr üzerine bana isâbet eden iki yüz elli sehm hisse-i şâyi‘amı kız karındaşım mezbûre Hadice Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz altmış guruşa bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz altmış guruşu mezbûre Hadice Hâtun yedinden ahz u kabz eylediğimden sonra hisse-i mezkûremin gabn ve tağrîrine müte‘allika âmme-i da‘vâdan mezbûre Hadice Hâtun’un zimmetini ibrâ ve ıskāt eyledim ba‘de’l-yevm menzil-i mahdûd-ı mezkûrda olan hisse-i mezkûrem kız karındaşım mezbûre Hadice Hâtun’un mülk-i müşterâsıdır keyfemâ teşâ ve tahtâr mutasarrıfa olsun dedikde gıbbe’t-tasdîki’ş-şer‘î vâki‘ hâli mevlâna-yı mezkûr mahallinde ketb ü tahrîr ve ma‘an ba‘s olunan Çukadâr Abdullah Beşe ve Muhzır Mustafa ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis aşer min-Şevvâli’l-mükerrem sene 1137. Şuhûdü’l-hâl: İmâm Abdurrahim Efendi b. Osman, Müezzin es-Seyyid Mustafa Çelebi b. Hasan, el-Hâc Ahmed b. Abdünnebi, el-Hâc Ali b. Hamza, İsmail Beşe b. Ahmed, Ahmed Kapudan b. Hızır, Mustafa Beşe b. Hamza, Hüseyin Çelebi b. Mehmed, el-Hâc Ali b. Mustafa, Mehmed Halife b. İsmail mi‘mâr, es-Seyyid Mustafa Halife b. Eyüb Çavuş-ı mi‘mâr.