Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 212 Hüküm no: 209 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Mehmed ile Süleyman Ağa b. Mehmed’in sulh oldukları Mahrûse-i Galata’da Okcu Musa mahallesinde sâkin Ahmed Çelebi b. Mehmed nâm kimesne meclis-i şer‘de işbu râfi‘u’l-kitâb Süleyman Ağa b. Mehmed nâm kimesne mahzarında ikrâr ve takrîr-i kelâm edip bundan akdem mezbûr Süleyman Ağa Rumeli’nde Avrethisârı kazâsında bir kaç kurâ mültezimi olduğu hâlde beher sene ücret-i kavliyle yirmi beş ay kitâbetle hizmetinde olup ve ücretim mukābelesinde bi’d-defe‘ât bana yirmi guruş ile bir kara kılıç def‘ u teslîm ben dahi yedinden ahz u kabz edip mâ‘adâsı zimmetinde bâkī kalmış idi deyü taleb ve da‘vâ sadedinde olmuş idim el-hâletü hâzihî beynimize muslihûn tavassut edip beni da‘vâ-yı mezkûremden mezbûr Süleyman Ağa ile on beş guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr on beş guruşu mezbûr Süleyman Ağa yedinden tamâmen ahz u kabz eylediğimden sonra husûs-ı mezbûra ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mezbûr Süleyman Ağa meclis-i şer‘de mezbûr Ahmed Çelebi mahzarında ikrâr ve takrîr-i kelâm edip hizmetkârım olup gāib ani’l-meclis Musa b. Abdullah mezbûr Ahmed Çelebi’ye bedel-i sulh olmak üzere teslîm eylediğim zikr olunan kara kılıcı benimdir deyü taleb ve da‘vâ ve şer‘an damân lâzım gelirse mezbûr Musa’ya kıymetini edâya ben dāmin oldum deyü ta‘ahhüd etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-şehri Ramazâni’l-mübârek sene 1137. Şuhûdü’l-hâl: Hüseyin Çelebi b. Ahmed, el-Hâc Mehmed b. Ahmed, İbrahim b. Mustafa, İbrahim b. Bedri, Mustafa b. el-Hâc Ahmed, Ahmed b. Mustafa.