Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 213 Hüküm no: 210 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hatun bt. Abdullah’ın vefat eden kocasından kendisine kalan menzili yeni kocası Hasan b. Abdullah’a sattığı Mahrûse-i Galata a‘mâlinden kasaba-i Beşiktaş’da Sinan Paşa mahallesinde sâkin iken bundan akdem vefât eden Ahmed b. Abdullah b. Abdurrahman’ın verâseti zevce-i metrûkesi Hadice bt. Abdullah nâm hâtun ile sulbî sagīr oğlu Mehmed’e münhasıra olup kable’l-kısme sagīr-i mezbûr Mehmed dahi vefât edip verâseti anası mezbûre Hadice Hâtun’a münhasıra olduğu lede’ş-şer‘i’l-enver zâhir ve mukarrer oldukdan sonra mezbûre Hadice Hâtun zâtı ba‘de’t-ta‘rîfi’ş-şer‘î meclis-i şer‘de hâlâ zevci işbu râfi‘u’l-kitâb Hasan b. Abdullah nâm kimesne mahzarında ikrâr ve takrîr-i kelâm edip zevcim müteveffâ-yı evvel-i mezbûrun terekesinden bana mevrûs ve hâlâ silk-i mülkümde münselik olup mahalle-i mezbûrede vâki‘ bir tarafdan Kantarkızı Emetullâh nâm hâtun mülkü ve bir tarafdan İbrahim Bey mülkü ve bir tarafdan benim âhar mülküm ve bir tarafdan tarîk-i âm ile mahdûd fevkānî bir bâb oda ve bir sofa ve tahtânî bir bâb oda ve kenîf ve bi’r-i mâ ve eşcâr-ı müsmire ve gayr-i müsmireli bir mikdâr bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcim mezbûr Hasan’a doksan guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr doksan guruşu zevcim mezbûr Hasan yedinden tamâmen ahz u kabz eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi zevcim mezbûr Hasan’ın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Yusuf Beşe b. Abdullah, İbrahim Çelebi b. Mustafa, Mustafa Çelebi b. Ahmed.