Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 214 Hüküm no: 211 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Osman’ın vakıf menzilini mütevelli el-Hâc Mehmed b. Mehmed’e sattığı Mahrûse-i Galata’da Câmi‘-i Cedîd mahallesinde sâkin Mehmed Ağa b. Osman mahfil-i şer‘de işbu râfi‘u’l-vesîka el-Hâc Mehmed b. Mehmed mahzarında ikrâr ve takrîr-i kelâm edip mezbûr el-Hâc Mehmed merhûm Esirî Vakfı’ndan olup zikr olunan Câmi‘-i Cedîd mahallesinde vâki‘ bir tarafdan Duhânî es-Seyyid Ahmed mülkü ve bir tarafdan Ahmed Yazıcı mülkü ve iki tarafdan tarîk-i âm ile mahdûd ulyâda bir bâb oda ve dehlîz ve vüstâda iki bâb oda ve bir sofa süflâda iki bâb oda ve kenîf ve mahtab ve bi’r-i mâ ve bir mikdâr havluyu müştemil vakıf menzilini beş yüz guruş bedel mukābelesinde izn-i mütevellî ile bana ferâğ ve tefvîz edip ben dahi ba‘de’t-tefevvüz ve’t-tesellüm ve’l-kabûl mezbûr el-Hâc Mehmed bedel-i ferâğ-ı merkūm beş yüz kırk guruşu yedimden tamâmen alıp kabz eylemiş idi binâen aleyh ben bedel-i ferâğ-ı mezbûr beş yüz kırk guruşa ve menzil-i mevkūf-ı merkūmun istîfâsına müte‘allika âmme-i de‘âvî ve mutâlebât ve eymân ve muhâsamâtdan mezbûr el-Hâc Mehmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Şevvâli’l-mükerrem sene 1137. Şuhûdü’l-hâl: es-Seyyid Mehmed b. es-Seyyid Himmet, Kethüdâ Mehmed Çelebi b. Abdullah, Kürkcü Süleyman Çelebi b. Abdurrahim, Kahveci İbrahim Çelebi b. Ali, Arusi Mustafa Efendi, Ahmed Efendi b. Süleyman.