Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 217 Hüküm no: 214 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Aslan’ın Mardiros v. Serkis ile Zahar v. Avanos’dan alacak davasından men edildiği Mahrûse-i Galata’da Bezzâzistân kurbünde hallâc olan Yorgi v. Aslan nâm zimmî meclis-i şer‘de kapamacı tâifesinden şerîkler olan işbu hâmilü’r-rakīm Mardiros v. Serkis ve Zahar v. Avanos nâm Ermeniler muvâcehelerinde üzerlerine da‘vâ ve takrîr-i kelâm edip şerîkân-ı merkūmân zimmetlerinde bundan akdem yedimden iştirâ etdikleri penbe bahâsından iki yüz otuz üç guruş bir zolata hakkım <> olup meblağ-ı mezbûrun yüz yirmi guruşunu ahz u kabz edip yüz on üç guruş bir zolata hakkım zimmetlerinde bâkī kalmağın hâlâ suâl olunup meblağ-ı bâkī-i mezbûrun dahi alıverilmesi matlûbumdur dedikde gıbbe’s-suâl merkūmân Mardiros ve Zahar cevâblarında fi’l-vâki‘ müdde‘î-i merkūmân zimmetlerinde mikdâr-ı mezkûr deyni olduklarını ikrâr lâkin meblağ-ı mezbûr iki yüz otuz üç guruş bir zolatayı bir sene mukaddem müdde‘î-i mezbûra tamâmen edâ ve teslîm edip ol dahi ber-vech-i muharrer yedimizden ba‘de’l-ahz meblağ-ı mezbûra müte‘allika âmme-i da‘vâdan zimmetimizi huzûr-ı Müslimînde ibrâ ve ıskāt eylemiş idi deyü def‘le mukābele eylediklerinde gıbbe’l-istintâk ve akībe’l-inkâr merkūmân Mardiros ve Zahar’dan def‘-i mezkûrlarını mübeyyine beyyine taleb olundukda udûl-i ahrâr-ı ricâl-i Müslimînden olup bezzâzistân erbâbından Ahmed Çelebi b. Abdullah ve diğer Ahmed Çelebi b. Mehmed nâm kimesneler ile Kirkor v. Bedros ve Panos v. Ohan nâm Ermeniler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ işbu müdde‘î-i merkūm Yorgi bir sene mukaddem şerîkân-ı merkūmân zimmetlerinde olan iki yüz otuz üç guruş bir zolatayı yedlerinden bi’t-tamâm ve’l-kemâl ahz u kabz edip meblağ-ı mezbûra müte‘allika âmme-i da‘vâdan şerîkân-ı merkūmân zimmetlerini ibrâ ve ıskāt eyledim deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i merkūm ber-vech-i şer‘î şerîkân-ı merkūmâna mu‘âraza ve müdâhaleden men‘ birle mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Şevvâli’l-mükerrem sene 1137. Şuhûdü’l-hâl: Ahmed Beşe b. Mehmed, Mehmed b. Mustafa, İsmail b. el-Hâc Süleyman, Mustafa b. Veli, es-Seyyid Mehmed es-Seyyid Ahmed, Mustafa Ağa b. el-Hâc Mahmud.