Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 218 Hüküm no: 215 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Topcubaşı İbrahim Ağa’nın vârisleri İsmail Ağa ile Fatıma Hatun’un Osman Beşe b. Mustafa’ya sattığı bahçede şuf‘a hakkı olmadığından Emine bt. Abdullah’ın davadan menedildiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden mevlânâ Halil Efendi b. Hüseyin me’zûnen irsâl olunup ol dahi mahrûse-i Galata a‘mâlinden kasaba-i Tophane’de Firuzağa mahallesi sâkinelerinden Emine bt. Abdullah nâm hâtunun sâkine olduğu menzile varıp zeyl-i vesîkada isimleri muharrer olan Müslimîn huzûrlarında akd-i meclis-i şer‘-i nebevî eyledikde zâtı Mehmed Çelebi b. Ali ve İsmail Çelebi b. Ali ta‘rîfleriyle mu‘arrefe olan mezbûre Emine Hâtun meclis-i ma‘kūd-ı mezbûrda zikri câî bahçeye mülk-i müşterâsı olmak üzere vaz‘-ı yedi lede’ş-şer‘ sâbit olan işbu râfi‘u’l-vesîka Osman Beşe b. Mustafa mahzarında üzerine da‘vâ ve takrîr-i kelâm edip mahalle-i mezûrede vâki‘ bir tarafdan Molla Feyzi mülkü ve ba‘zen benim işbu mülk menzilim ve bir tarafdan yine benim bahçem ve ba‘zen Terzi Hasan mülkü ve ba‘zen Dellâk Hüseyin Odabaşı tasarrufunda olan vakıf menzil ve ba‘zen Ellidokuz Çorbacı mülkü ve bir tarafdan mahalle-i merkūme imâm ve müezzinine meşrûta vakıf menziller ve bir tarafdan tarîk-i âm ile mahdûd fevkānî bir bâb oda ve bir sofa ve matbah ve bi’r-i mâ ve kenîf ve iki câmekân ve bir matbah ve bir hamâm arsalarını ve bir köşk ve bir havuz ve bir şadırvan ve mezbûr Molla Feyzi ile müşterek bi’r-i mâ ve limonluk ve eşcâr-ı müsmire ve gayr-i müsmireyi müştemil bahçe merhûm Topcubaşı İbrahim Ağa’nın ile’l-vefât yedinde mülkü olup ve ba‘de vefâtihî kebîr oğlu İsmail Ağa ile zevcesi Hâtun bt. el-Hâc Ali’ye mevrûs olmağın mezbûrân İsmail Ağa ve Fâtıma Hâtun dahi zikr olunan bahçeyi târih-i kitâbdan beş gün mukaddem mezbûr Osman Beşe’ye yedi yüz guruş semen-i makbûza bâtten bey‘ u teslîm edip ol dahi ber-vech-i muharrer iştirâ ve tesellüm ve kabûl eyledikden sonra sâlifü’z-zikr bahçe benim işbu mülk menzilime muttasıl ve mülâsık olup şefî‘ olduğum ecilden ben târih-i mezbûrda bey‘-i mezbûru istimâ‘ eylediğim hînde bilâ te’hîr taleb-i muvâsebe ve şuf‘a edip Müslimîn işhâd eylemişidim binâen alâ-zâlik hâlâ bahçe-i merkūmeyi şefî‘ olduğum cihetle mezbûr Osman Beşe’den taleb eylediğimde vermede te‘allül eder suâl olunup alıverilmesi murâdımdır dedikde gıbbe’s-suâl mezbûr Osman Beşe cevâbında fi’l-vâki‘ bahçe-i mahdûde-i merkūmeyi ber-minvâl-i muharrer târih-i kitâbdan beş gün mukaddem mezbûrân İsmail Ağa ve Fâtıma Hâtun’dan yedi yüz guruş semen-i medfû‘a iştirâ ve tesellüm eyleyip ve bahçe-i merkūme müdde‘iyye-i mezbûre Emine Hâtun’un menziline muttasıl ve mülâsık olduğunu ikrâr lâkin müdde‘iyye-i mezbûrenin bey‘-i merkūmu istimâ‘ eylediği hînde bilâ te’hîr taleb-i muvâsebe ve şuf‘a eylediğini inkâr eylediğinden mâ‘adâ bahçe-i merkūmenin arsası merhûm Sultan Bayezid Hân -aleyhi’r-rahmeti ve’l-gufrân- Vakfı’ndan olmağla beher sene cânib-i vakfa otuz üç akçe mukāta‘ası vardır deyü iddi‘â edip ve müdde‘iyye-i mezbûre hâl minvâl-i muharrer üzere olduğunu ani’l-ikrâr ve’l-inkâr mütereddide olmağla mevlânâ-yı mezkûr dahi husûs-ı mezbûra bî-garaz ehl-i vukūf Müslimînden vakf-ı mezbûrun câbîsi Çorbacızâde el-Hâc Mustafa ve mahalle-i mezbûre imâmı el-Hâc İsmail Efendi ve İsmail Çelebi b. Ali ve Mehmed Çelebi b. Ali nâm kimesnelerden istifsâr ve istihbâr eyledikde fi’l-hakīka bahçe-i mahdûd-ı merkūmun arsası zevce-i meşrûh-ı merhûm Sultan Bayezid Hân Vakfı’ndan olup beher sene cânib-i vakfa otuz üç akçe mukāta‘ası olduğunu müdde‘iyye-i mezbûre Emine Hâtun muvâcehesinden her biri alâ tarîki’ş-şehâde haber verip ve bu makūle mukāta‘alı arsada şuf‘a da‘vâsı meşrû‘ olmadığı kütüb-i vakfiyede mastûr ve mukayyed olmağın mevlânâ-yı mezkûr dahi mezbûre Emine Hâtun’u bilâ vech-i şer‘î mezbûr Osman Beşe’ye mu‘ârazadan ba‘de’l-men‘ vâki‘ hâli mahallinde ketb ü tahrîr ve ma‘an ba‘s olunan Serrac Yusuf b. Abdullah ve muhzır Sırmakeş Mustafa b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Şevvâli’l-mükerrem sene 1137. Şuhûdü’l-hâl: Sırmakeş Mustafa b. Ahmed, Yusuf b. Abdullah serrac, Kayyum Mehmed b. Ali, Kollukcu Hüseyin Ağa, İsmail Çelebi b. Ali, Arabzâde Mustafa b. Ahmed, İbrahim Efendi b. İsmail el-imâm, el-Hâc İsmail Efendi el-imâm.