Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 219 Hüküm no: 216 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Ali’ye yetiştirmek üzere aldığı Mehmed ve Hadice isimli çocuklar için günlük dört para nafaka ödenmesi Mahrûse-i Galata muzâfâtından Yaş Hasanefendi mahallesinde sâkine işbu râfi‘atü’l-vesîka Fâtıma bt. Ali nâm hâtun meclis-i şer‘de takrîr-i kelâm ve ta‘bîr ani’l-merâm edip târih-i kitâbdan yedi gün mukaddem sefîne reîslerinden bir kimesne İznik kurbünde Kerayik?karyesinden olmak üzere Mehmed ve Hadice nâm sagīrleri li-ecli’t-tebennî Kasımpaşa İskelesi’nde bana def‘ u teslîm edip ben dahi ber-vech-i muharrer ahz eylemiş idim hâlâ sagīrân-ı mezbûrânın nafaka ve kisve bahâya eşedd-i ihtiyâcları olmağla sagīrân-ı mezbûrânın nafaka ve kisve ve levâzım-ı zarûriyyeleri için men-lehü’l-hakku’t-taleb üzerine cânib-i şer‘den kadr-i kifâye meblağ farz ve takdîr olunması murâdımdır dedikde hâkim-i muvakkı‘-ı a‘la’l-kitâb tûbâ-lehû ve hüsn- meâb efendi hazretleri dahi sagīrân-ı mezbûrân Mehmed ve Hadice’nin nafaka ve kisve ve levâzım-ı sâire-i zarûriyyeleri için men lehü’l-hakki’t-taleb üzerine her biri için yevmî ikişer paradan yevmî dört para farz ve takdîr eyleyip meblağ-ı mefrûz-ı mezkûru sagīrân-ı mezbûrânın nafaka ve kisve vesâir levâzım-ı zarûriyyelerine harc ve sarfa ve lede’l-iktizâ istidâneye ve ınde’z-zafer men lehü’l-hakku’t-taleb üzerine rücû‘a mezbûre Fâtıma Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem sene 1137. Şuhûdü’l-hâl: Halil Çelebi b. Mustafa, Mustafa b. Ahmed, Mehmed b. Ahmed, Ali b. Ahmed, İbrahim b. Mustafa, Ebûbekir b. Hüseyin.