Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 220 Hüküm no: 217 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Musa’nın kocası Mehmed Beşe b. Hasan ile alacak davasında zimmetlerini ibra ettikleri Hâssa bostâncılarından Ali Bey b. İbrahim meclis-i şer‘de medîne-i hazret-i Ebî Eyüb Ensârî kazâsına tâbi‘ Hasköy mahallâtından Abdüsselam mahallesinde sâkine Rukiye bt. Musa b. Abdullah nâm hâtun tarafından husûs-ı âti’z-zikri tasdîka vekîli olduğu zât-ı mezbûreyi ma‘rifet-i şer‘iyye ile ârifân Hasan b. Ali ve Mehmed b. Ahmed nâm kimesneler şehâdetleriyle sâbit olan Mehmed Beşe b. Hasan nâm kimesne mahzarında ikrâr ve takrîr-i kelâm edip ben bundan akdem mezbûre Rukiye’yi üç bin altı yüz akçe mehr-i mu‘accel ve dört bin akçe mehr-i mü’eccel üzerine tezevvüc eylediğimden sonra mezbûre Rukiye’yi duhûl ve halvet-i sahîha bulunmaksızın bâyinen tatlîk eylediğim cihetle mihreyn-i mezbûreynden her birinin nısflarını şer‘an reddi lâzım gelmeğin hâlâ ben mehr-i mu‘accel olmak üzere mezbûre Rukiye’ye medfû‘um olan meblağ-ı mezbûr üç bin altı yüz akçenin nısfından ve beş guruş kıymetli bir çift sepet sandığı ve bir guruş kıymetli bir çift beyaz mest babucdan rızâm ile fâriğ olup ol dahi mehr-i mü’ecceli olan meblağ-ı mezbûr dört bin akçenin nısfından ve bana medfû‘u olan bir sırmalı nişân makremesinden kezâlik rızâsıyla fâriğa oldukdan sonra zikr olunan husûslar vesâire müte‘allika âmme-i da‘vâdan birbirimizin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem sene 1137. Şuhûdü’l-hâl: Mustafa Efendi b. Hasan, Ahmed Efendi b. Süleyman, Süleyman Efendi b. Osman, Yahya Efendi b. Yusuf Efendi, Serbölük Halil Ağa.