Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 220 Hüküm no: 218 Orijinal metin no: [31a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühâni bt. el-Hâc Mehmed’in Foti v. Nikola ile Margarit v. Oyarni’ye sattıkları arsadan kaynaklanan alacak davasında sulh oldukları Mahmiye-i İstanbul’da el-Hâc Hasan mahallesinde sâkine ve zâtı el-Hâc Mustafa b. Ahmed ve el-Hâc İbrahim b. Halil nâm kimesneler ta‘rîfleriyle mu‘arrefe olan Ümmühâni bt. el-Hâc Mehmed nâm hâtun meclis-i şer‘de işbu hâmilü’r-rakīm Foti v. Nikola ve Margarit v. Oyarni nâm zimmîler muvâcehelerinde ikrâr ve takrîr-i kelâm edip mahrûse-i Galata’da Sultan Bayezid mahallesinde vâki‘ bir tarafdan Yusuf Efendi odaları ve bir tarafdan Karaköy Hamamı ve tarafeynden tarîk-i âm ile mahdûd olup tarîk-i âm tarafında vâki‘ tûlen ve arzen bi-hesâb-ı terbî‘î dört yüz dört zirâ‘ı merhûm Üskûfî Sinan Bey Vakfı’ndan beher şehr sekiz akçe mukāta‘a ile benim ile li-ebeveyn karındaşlarım Hadice ve Rukiye ve İsmail’in iştirâken tasarrufunda olup ve mâ‘adâsı iştirâken mülkümüz olan muhterik menzil arsasının mülk olan mahall-i mu‘ayyenini dört yüz otuz guruşa ve vakıf olan mahall-i mu‘ayyenini dahi izn-i mütevellî ile üç yüz guruş bedel mukābelesinde her birimiz bi’l-asâle ve bi’l-vekâle ve bi’l-vesaye merkūmân Foti ve Margarit’e bâ-hüccet-i şer‘iyye ale’l-iştirâki’s-seviy cem‘an yedi yüz otuz guruşa bey‘ u tefvîz ve teslîm eylediğimizde onlar dahi ber-vech-i muharrer iştirâken iştirâ ve tefevvüz ve tesellüm ve kabûl eylemişler idi binâen aleyh hâlâ ben ancak arsa-i mevkūfe-i merkūme bedeli olan meblağ-ı mezbûr üç yüz guruşdan hisseme isâbet eden yetmiş beş guruşu merkūmân Foti ve Margarit’den ahz u kabz eylemeyip zimmetlerinde bâkī kalmış idi deyü da‘vâ eylediğimde onlar dahi hâl minvâl-i muharrer üzere olduğunu ikrâr lâkin meblağ-ı mezbûr yetmiş beş guruşu hîn-i akidde tarafından kabza vekîl olan gāib ani’l-meclis zevcin Mustafa Ağa b. Süleyman b. Abdullah nâm kimesneye tamâmen def‘ u teslîm eyledik deyü ba‘de’d-def‘ ve’l-inkâr merkūmân Foti ve Margarit def‘-i mezkûrlarını beyân sadedinde iken beynimize muslihûn tavassut edip beni da‘vâ-yı mezkûremden merkūmân Foti ve Margarit ile yirmi beş guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr yirmi beş guruşu merkūmân Foti ve Margarit yedlerinden bi’t-tamâm ve’l-kemâl ahz u kabz eyledim ba‘de’l-yevm mülk-i mezbûr ile vakf-ı mezkûrda olan hisse-i şâyia‘-i ma‘lûmem merkūmân Foti ve Margarit’in iştirâken mülk-i müşterâları ve hakk-ı müfevvezleri olmuşdur benim kat‘an alâka ve medhalim kalmamışdır dedikde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fi’l-yevmi’s-sâdis aşer min-Şevvâli’l-mükerrem sene 1137. Şuhûdü’l-hâl: es-Seyyid Ali Ağa b. Hasan, Attâr Hüseyin Çelebi b. Abdullah, Saatci Ali Çelebi b. Mustafa, Mübaşir el-Hâc Mustafa Çavuş, Mustafa Çelebi b. Mehmed, İbrahim Çelebi b. Muharrem, Halil Çelebi b. Mustafa.