Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 221 Hüküm no: 219 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Mustafa’nın küçük yaştaki İsmail b. Hasan’dan muhalaa ile boşandığı Mahrûse-i Galata’da Bereketzâde mahallesinde sâkine zâtı Bekir Efendi b. Osman ve Mustafa b. Ahmed nâm kimesneler ta‘rîfleriyle mu‘arrefe olan Fâtıma bt. Mustafa nâm hâtun meclis-i şer‘de zevc-i muhâlı‘ı İsmail b. Hasan nâm sağīrin anası ve tesviye-i umûruna kıbel-i şer‘den mansûbe vasîsi olan işbu râfi‘atü’l-vesîka Âişe bt. Abdurrahman nâm hâtun mahzarında bi-tav‘ihâ ikrâr ve takrîr-i kelâm edip zevcim sagīr-i mezbûr İsmail ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum ecilden zimmetimde mütekarrır ve ma‘kūdün-aleyh olan beş yüz akçe mehr-i mü’eccelimden fâriğa olup nafaka-i iddet ve me’ûnet-i süknâm dahi kendi üzerime olmak üzere vasiye-i mezbûre Âişe Hâtun ile muhâla‘a-i sahîha-i şer‘iyye ile muhâla‘a olduğumda mezbûre Hadice Hâtun dahi ber-vech-i muharrer bi’l-vesaye hul‘-i mezbûru kabûl eyledikden sonra hukūk-ı zevciyyete vesâire müte‘allika da‘vâdan zevcim sagīr-i mezbûr ile anası vasiye-i mezbûrenin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ hüve’l-vâki bi’l-ibtigā ketb olundu. Fi’l-yevmi’s-sâmin ve’l-ışrîn min-Şevvâli’l-mükerrem sene 1137. Şuhûdü’l-hâl: İbrahim Çelebi b. Muharrem, Halil Çelebi b. Mustafa, huddâm Mustafa b. Ahmed, Molla Mehmed b. Yusuf, Mustafa b. Ahmed, Süleyman Beşe b. Ahmed.