Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 222 Hüküm no: 220 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Efendi b. Mehmed Efendi’nin varislerinden Safiye Hatun’un menzil hissesini Molla Abdullah’a sattığı Mahmiye-i İstanbul’da Saray-ı Atîk kurbünde Mercan Ağa mahallesinde sâkin olup merhûme Valide Sultan Câmi‘-i Şerifi imâmı iken bundan akdem vefât eden Abdurrahim Efendi b. Mehmed Efendi’nin verâseti <> sulbî kebîr oğulları Süleyman Efendi ve Molla Abdullah nâm kimesnelere ve sulbiye kebîre kızı Safiye nâm hâtuna münhasıra ve tashîh-i meseleleri bi-hükmi’l-ferâiz beş sehimden i‘tibâr olunup sihâm-ı mezbûreden ikişer<> mezbûrân Süleyman Efendi ve Molla Abdullah’dan her birine bir sehmi mezbûre Safiye Hâtun’a isâbet ve intikāl eylediği lede’ş-şer‘i’l-enver zâhir ve mukarrer oldukdan sona zâtı Hasan Çelebi b. Ali ve Ali Çelebi b. Hüseyin nâm kimesneler ta‘rîfleriyle mu‘arrefe olan mezbûre Safiye Hâtun meclis-i şer‘de işbu râfi‘u’l-vesîka mezbûr Molla Abdullah mahzarında ikrâr ve takrîr-i kelâm edip babam müteveffâ-yı mezbûrun terekesinden olup mahrûse-i Galata tevâbi‘inden İstinye nâhiyesinde vâki‘ bir tarafdan Hasan Beşe mülkü ve bir tarafdan Emir Çelebi arsası ve bir tarafdan sâhil-i bahr ve bir tarafdan tarîk-i âm ile mahdûd yalı ta‘bîr olunur menzil arsası ile eşcâr-ı müsmire ve gayr-i müsmireli bahçe ve bahçe-i mezbûreye muttasıl on iki göz kayıkhâneden ber-vech-i tashîh mezkûr bana isâbet eden hisse-i irsiyye-i şâyi‘amı cemî‘ tevâbi‘ ve levâhıkıyla karındaşım mezbûr Molla Abdullah’a yüz yirmi guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ u teslîm ve temlîk edip ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı merkūm yüz yirmi guruşu karındaşım mezbûr Molla Abdullah yedinden tamâmen ahz u kabz eyledim ba‘de’l-yevm arsa ve bahçe ve kayıkhânede olan hisse-i irsiyyem karındaşım mezbûrun mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem sene 1137. Şuhûdü’l-hâl: Arusi Mustafa Efendi, Ali Efendi b. Ömer Efendi, Halil Çelebi b. Mustafa, Mehmed Çelebi b. Halil, Baba Yusuf b. Abdullah, Abdullah Efendi b. Abdurrahim, Berber Ali Çelebi.