Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 223 Hüküm no: 221 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgaki v. Nikola’nın Yani v. Franko’da olan alacağını taksitlendirdiği Deryâ-yı Sefîd cezîrelerinden Mikanos cezîresi ahâlîsinden olup hâlâ Balıkpazarı’nda misâfiren sâkin işbu râfi‘u’r-rakīm Yorgaki v. Nikola meclis-i şer‘de medyûnu Yani v. Franko nâm zimmî muvâcehesinde ikrâr ve takrîr-i kelâm edip yedimde olan işbu i‘lâm nâtık olduğu üzere merkūm Yani zimmetinde cihet-i kefâletden edâsına tenbîh-i şer‘î lâhik olan iki yüz guruşun kırk guruşundan fâriğ olduğumdan sonra mâ‘adâsı olan yüz altmış guruşu def‘aten edâya adem-i kudretinden nâşî ber-vech-i âtî te’cîl ve taksîte tâlib olmağla ben dahi senede bana otuz ikişer guruş vermek üzere merkūm Yani’yi târih-i kitâbdan beş sene tamâmına değin te’cîl ve taksît eylediğimde ol dahi te’cîl-i mezbûru kabûl ve meblağ-ı mezbûru ber-vech-i muharrer edâya ta‘ahhüd etmeğin mâ-hüve’l-vâkı‘ li-ecli’t-tevsîk bi’l-ibtigā ketb olundu. Fî-gurre-i Zilka‘de sene 1137. Şuhûdü’l-hâl: el-Hâc Hüseyin Çavuş el-mübâşir, Süleyman Efendi b. Osman, İbrahim Efendi b. Hüseyin, Takyeci İsmail b. Ahmed, el-Hâc Hüseyin b. Abdullah, Hüseyin Çelebi b. Eyüb, Nikola Palamari, Patista Horti, Yanaki v. Nikola.