Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 223 Hüküm no: 222 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. İsrail’in ölümüyle dörtte bir hissesine sahip olduğu menzildeki hissesinin vârisleri tarafından İsrail v. Avram’a satıldığı Mahmiye-i İstanbul’da Balatkapısı hâricinde Karabaş mahallesinde sâkin iken bundan akdem hâlik olan İsak v. İsrail nâm Yahûdinin verâseti zevce-i metrûkesi Hanola bt. Yako ile kebîr oğulları İsrail ve Salti ve kebîre kızı Sinyoro ile sagīr evlâdı İsak ve Uri’ye münhasıra ve tashîh-i mes’eleleri bi-hükmi’l-ferâiz altmış dört sehimden i‘tibâr olunup sihâm-ı mezbûreden sekiz sehmi merkūme Hanola’ya ve on dörder sehmi merkūmûn İsrail ve Salti ve İsak’dan her birine ve yedişer sehmi merkūmân Sinoro ve Uri’den her birine isâbet eylediği ve merkūme Hanola sagīrân-ı merkūmânın tesviye-i emirlerini rü’yete bâ-hüccet-i şer‘iyye kıbel-i şer‘den mansûbe vasîleri oldukdan sonra merkūm İsrail kendi tarafından asâleten ve üveyi anası vasiye-i merkūme Hanola ile karındaşları merkūmân Salti ve Sinoro taraflarından menzil-i câi’z-zikrde olan hisse-i irsiyyelerini âhara bey‘ ve semenlerini ahz u kabz ve kendülere îsâle ve umûr-ı mezkûra mütevakkıfe olduğu husûsların küllîsine vekîlleri olduğu Yasef v. Avram ve Yoda v. Avram şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lâhik olmağla vekâleten mahfil-i şer‘de işbu hâmilü’s-sifr İsrail v. Avram nâm Yahûdi muvâcehesinde bi’l-asâle ve bi’l-vekâle ikrâr ve takrîr-i kelâm edip mahrûse-i Galata a‘mâlinden Beşiktaş nâhiyesine tâbi‘ Arnavud karyesinde vâki‘ iki tarafdan Selmiya mülkü ve iki tarafdan leb-i deryâ ve tarîk-i âm ile mahdûd ulyâda üç bâb oda ve dehlîz vüstâda bir bâb oda ve matbah ve dehlîz ve süflâda bir bâb oda ve kenîf ve liman ve iki attâr dükkânlarını müştemil mülk menzilin dört hissede bir hissesi babam hâlik-i merkūmun İsak’ın ile’l-helâk yedinde mülkü olup ve ba‘de helâkihî benimle verese-i sâiresine mevrûs olmağın ben dahi asâlet ve vekâlet-i mahkiyelerim hasebiyle menzil-i merkūmda olan rub‘ hisse-i irsiyye-i merkūmemizi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm İsrail’e yüz otuz guruşa bey‘ u teslîm eylediğimde ol dahi ber-minvâl-i muharrer iştirâ ve tesellüm ve kabûl eyledikden sonra semen-i merkūm yüz otuz guruş müşterî-i merkūm yedinden tamâmen alıp kabz eyledim ba‘de’l-yevm menzil-i mahdûd-ı merkūmda olan rub‘ hisse-i merkūmem bi-cümletin mâ yeştemiluhâ müşterî-i mezbûr İsrail’in mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî 24 L sene 1137. Şuhûdü’l-hâl: Usta İbrahim Çelebi b. Hüseyin, Yasakcı es-Seyyid Ali b. es-Seyyid Mehmed, Mustafa Efendi b. Hasan, Ahmed Efendi b. Süleyman, Halil Çelebi b. Mustafa, Bakkal Rali, Bakkal Zave, Bakkal Todori, Yanaki Reis, Avram v. İsak, Yasef v. İsak, Attar David, Kuruçeşmeli Attar David ve gayrühum.