Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 224 Hüküm no: 223 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalçacı Hüseyin b. Ahmed’in kendisini bıçaklayan Ebubekir b. Mahmud ile sulh olduğu Mahrûse-i Galata’da Arab Çarşısı kurbünde vâki‘ Bekar odaları’nda sâkin Nalçacı Hüseyin b. Ahmed b. Abdullah nâm mecrûh tarafından zikri âtî sulh ve ibrâyı ikrâra vekîli olduğu Hallâc Mehmed Beşe [b.] Mustafa ve Kahveci Mustafa Beşe b. Mustafa nâm kimesneler şehâdetleriyle sâbit olan es-Seyyid Mustafa Çelebi b. Hüseyin nâm kimesne meclis-i şer‘de yine nalçacı işbu râfi‘u’l-kitâb Ebûbekir b. Mahmud nâm kimesne mahzarından bi’l-vekâle ikrâr ve takrîr-i kelâm edip mezbûr Ebûbekir târih-i kitâbdan beş gün mukaddem Arab Çarşısı’nda sûkda ba‘de’l-asr müvekkil-i mezbûr Hüseyin’i bıçak ile sağ gerdanından amden bi-gayrı hakkın darb ve cerh etmeğle müvekkil-i mezbûr dahi mûceb-i şer‘îsini mezbûr Ebûbekir’den taleb ve da‘vâ sadedinde olmuş idi el-hâletü hâzihî beynlerine muslihûn tavassut edip müvekkil-i mezbûru da‘vâ-yı mezkûresinden mezbûr Ebûbekir ile an-inkâr fedâen li’l-yemîn yirmi guruş üzerine inşâ-i akd-i sulh eylediklerinde ol dahi ber-vech-i muharrer sulh-i muzbûru kabûl ve bedel-i sulh olan meblağ-ı mezbûr[u] Ebûbekir yedinden tamâmen alıp kabz eyledikden sonra cerh-i mezbûra ve mâ yahdesü anhuya müte‘allika âmme-i da‘vâdan mezbûr Ebûbekir’in zimmetini ibrâ ve ıskāt edip ol dahi bedel-i sulh-i mezbûr yirmi guruşa müte‘allika âmme-i da‘vâdan müvekkil-i mezbûr ile benim zimmetimi ibrâ ve ıskāt eyledi mezbûr Ebûbekir dahi vekîl-i mezbûru ikrâr-ı meşrûhumda vicâhen ve şifâhen tahkīk etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis min-Zilka‘deti’ş-şerîfe sene 1137. Şuhûdü’l-hâl: Kethüdâ İsmail Çelebi, el-Hâc İsmail b. İbrahim, es-Seyyid Ali Çelebi b. Osman, el-Hâc Mehmed b. Mehmed, es-Seyyid Mehmed b. es-Seyyid Himmet, Usta Mehmed b. Abdullah, Abdullah Çelebi b. Osman.