Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 225 Hüküm no: 224 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alkan v. İsrail’in dörtte bir menzil hissesini İsrail v. Avram’a sattığı Mahmiye-i İstanbul’da Balatkapısı hâricinde vâki‘ Karabaş mahallesinde sâkin <> Alkan v. İsrail nâm Yahûdi meclis-i şer‘de karındaşı oğlu işbu hâmilü’r-rakīm İsrail v. Avram nâm Yahûdi muvâcehesinde ikrâr ve takrîr-i kelâm edip mahrûse-i Galata a‘mâlinden Beşiktaş nâhiyesine tâbi‘ Arnavud karyesinde vâki‘ bir tarafdan Selmiya mülkü ve iki tarafdan leb-i deryâ ve bir tarafdan tarîk-i âm ile mahdûd ulyâda üç bâb oda ve dehlîz vüstâda bir bâb oda ve matbah ve dehlîz ve süflâda bir bâb oda ve kenîf ve liman ve iki attâr dükkânlarını müştemil mülk menzilin dört hissede bir hissesini benim mülküm olmağın ben dahi menzil-i merkūmda olan rub‘ hisse-i merkūmeyi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm İsrail’e yüz yirmi beş guruşa mukaddemâ bey‘ u teslîm etmiş idim el-hâletü hâzihî semeni olan meblağ-ı mezbûru müşterî-i mersûm İsrail yedinden tamâmen alıp kabz eyledim fîmâ ba‘d menzil-i mahdûd-ı merkūmda olan rub‘ hisse-i merkūmem bi-cümletin mâ yeştemilühâ müşterî-i merkūm İsrail’in mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Şevvâli’l-mükerrem sene 1137. Şuhûdü’l-hâl: İbrahim Usta b. Hüseyin, Yasakcı es-Seyyid Ali b. es-Seyyid Mehmed, Arûsî Mustafa Efendi, Sipahi Ahmed b. Süleyman, Süleyman Efendi b. Osman, İbrahim Çelebi b. Muharrem, Halil Çelebi b. Mustafa, Bakkal Rali, Bakkal Todori, Bakkal Ramzi, Yanaki Reso, Avram v. İsak, Attar Davit, Attar Kuruçeşmeli Davit.