Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 226 Hüküm no: 225 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsrail v. Avram’ın dörtte üç hissesini menzilin dörtte bir hissesine sahip Selmiya b. Kirdya’ya sattığı Zikri câî mülk menzilin dört hissede bir hissesi Selmiya v. Kirdya ve selâse-i erbâ‘ı İsrail [v.] Avram nâm Yahûdi’nin iştirâken mülkleri olduğu lede’ş-şer‘i’l-enver zâhir ve müte‘ayyin oldukdan sonra merkūm İsrail meclis-i şer‘de işbu hâmilü’r-rakīm mersûm Selmiya muvâcehesinde ikrâr ve takrîr-i kelâm edip mahrûse-i Galata a‘mâlinden Beşiktaş nâhiyesine tâbi‘ Arnavud karyesinde vâki‘ iki tarafdan merkūm Selmiya mülkü ve tarafeynden leb-i deryâ ve tarîk-i âm ile mahdûd ulyâda üç bâb oda ve dehlîz vüstâda bir bâb oda ve matbah ve dehlîz süfâlada bir bâb oda ve kenîf ve liman ve iki attâr dükkânlarını müştemil mülk menzilin ânifen zikr olunduğu üzere dört hissede üç hissesi benim mülküm olmağın hâlâ ben menzil-i mezkûrda olan üç sehm hisse-i şâyi‘a-i merkūmemi cemî‘ tevâbi‘ ve levahıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Selmiya’ya sekiz yüz guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûru müşterî-i merkūm Selmiya yedinden tamâmen alıp kabz eyledim fîmâ ba‘d menzil-i mahdûd-ı merkūmun mecmû‘u bi-cümletin mâ yeştemilehû ve yahvîhi müşterî-i merkūmun mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis ve’l-ışrîn min-Şevvâli’l-mükerrem sene 1137. Şuhûdü’l-hâl: es-Sâbikūn.