Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 226 Hüküm no: 226 Orijinal metin no: [32a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. İsrail’in ölümüyle varislerinden İsak ve Orvi’nin nafakaya ihtiyacları olduğundan anneleri Hanole bt. Yako’ya hisselerini başkalarına satmaya izin verildiği Mahmiye-i İstanbul’da Balatkapısı hâricinde Karabaş mahallesinde sâkin iken bundan akdem hâlik olan İsak v. İsrail nâm Yahûdinin verâseti zevcesi Hanola bt. Yako ile kebîr oğulları İsrail ve Salti ve kebîre kızı Sinyor[o] ile sagīr evlâdı İsak ve Uri’ye münhasıra ve tashîh-i mes’eleleri bi-hükmi’l-ferâiz altmış dört sehimden i‘tibâr olunup sihâm-ı mezbûreden sekiz sehmi merkūme Hanola’ya ve on dörder sehmi merkūmûn İsrail ve Salti ve İsak’dan her birine ve yedişer sehmi merkūmetân Sinyor ve Uri’den her birine isâbet eylediği ve merkūme Hanola evâdı sagīrân-ı merkūmânın tesviye-i umûrlarını rü’yete bâ-hüccet-i şer‘iyye kıbel-i şer‘den mansûbe vasîleri olduğu lede’ş-şer‘i’l-enver zâhir ve mütebeyyin oldukdan sonra vasiye-i merkūme Hanola’nın üveyi oğlu ve tarafından husûs-ı âti’l-beyâna vekîli olduğu merkūmenin şahsını ma‘rifet-i şer‘iyye ile ârifân Yasef v. Avram ve Yoda v. Avram nâm Yahûdiler şehâdetleriyle şer‘an sâbit olan işbu hâmilü’r-rakīm merkūm İsrail meclis-i şer‘de bi’l-vekâle takrîr-i kelâm edip mahrûse-i Galata a‘mâlinden Beşiktaş nâhiyesine tâbi‘ Arnavud karyesinde vâki‘ iki tarafdan Selmiya mülkü ve tarafeynden leb-i deryâ ve tarîk-i âm ile mahdûd müştemilât-ı ma‘lûmeyi muhtevî mülk menzilin rub‘u ile’l-helâk babam hâlik-i merkūmun mülkü olmağla ba‘de helâkihî benimle verese-i sâire-i merkūmesine mevrûs olup lâkin hisse-i merkūme kabîl-i kısmet olmayıp ve hâsıl-ı harcına vefâ eylemediğinden nâşî verese-i kibâr hisselerini âhara bey‘ murâd edip ve sagīrân-ı merkūmân İsak ve Uri’nin nafaka ve kisve bahâya şiddet-i ihtiyâcları olmağla tashîh-i mezbûr üzer rub‘ hisse-i merkūmede olan mikdâr-ı mezkûr hisse-i irsiyyeleri zarûret-i nafaka için verese-i kibâr ile ma‘an semen-i misli ile âhara bey‘ ve semeni ba‘de’l-istirbâh hâsıl olan nemâsından sagīrân-ı mezbûrâna infâk ve iksâ olunması haklarında her vechile hayr ve nâfi‘ olmağın müvekkilem vasiye-i merkūme Hanola dahi sagīrân-ı merkūmânın [32b] hisselerini vech-i muharrer üzere semen-i misilleriyle âhara bey‘a kıbel-i şerî‘at-ı garrâdan izin taleb eder deyip ve hâl minvâl-i muharrer üzere olduğunu zeyl-i vesîkada isimleri muharrer olan bî-garaz Müslimîn dahi haber vermeğin hâkim-i muvakkı‘-ı a‘la’l-kitâb -rafa‘a kadrahû mevlâhü’l-vahhâb- efendi hazretleri dahi sagīrân-ı merkūmân İsak ve Uri’nin mikdâr-ı mezkûr hisselerini semen-i misilleriyle âhara bey‘a anaları vasiye-i merkūme Hanola’ya izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî ve’l-ışrîn min-Şevvâli’l-mükerrem sene 1137. Şuhûdü’l-hâl: es-Sâbikūn.