Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 228 Hüküm no: 228 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samaven v. Kiryako’nu kendisini bıçakla yaralayan Süleyman b. Ahmed ile sulh olduğu Mahrûse-i Galata hâricinde Kamer Hâtun mahallesinde sâkin Samaven v. Kiryako v. Karabet nâm Ermeni tarafından ibrâ-i câi’z-zikri ikrâra vekîli olduğu Abraham v. Manuk ve Bağdik v. Minas şehâdetleriyle mahzar-ı hasm-ı câhidde şer‘an sâbit olan Kirkor v. Manuk nâm Ermeni meclis-i şer‘de işbu râfi‘u’l-vesîka Süleyman b. Ahmed mahzarında bi’l-vekâle ikrâr ve takrîr-i kelâm edip mezbûr Süleyman târih-i kitâbdan dört gün mukaddem Galata hâricinde Kalafatcıbaşı mahallesinde vâki‘ mekābir-i Müslimînde kabîl-i asrda müvekkilem merkūm Samaven’i amden bi-gayrı hakkın sağ uyluğundan bıçak ile darb ve cerh etmeğle ol dahi mûceb-i şer‘îsini mezbûr Süleyman’dan ba‘de’d-da‘vâ ve’l-inkâr müvekkilim merkūm müdde‘âsını isbâta adem-i kudretinden nâşî mezbûr Süleyman’ı tahlîf sadedinde iken beynlerine muslihûn tavassut edip müvekkilim merkūm Samaven’i da‘vâ-yı mezkûresinden mezbûr Süleyman ile an-inkâr fedâen li’l-yemîn on beş guruş üzerine inşâ-i akd-i sulh etdiklerinde ol dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûru yedinden tamâmen ahz u kabz eyledikden sonra cerh-i mezbûra ve mâ yahdesü anhuya müte‘allika âmme-i da‘vâdan mezbûr Süleyman’ın zimmetini ibrâ ve ıskāt edip mezbûr Süleyman dahi bedel-i sulh-i mezbûra müte‘allika da‘vâdan müvekkil-i merkūm Samaven’in zimmetini ibrâ ve ıskāt eyledi dedikde gıbbe’t-tasdîki’ş-şer‘î mezbûr Süleyman’ın nefsine ve hîn-i mutâlebede meclis-i şer‘a ihzârına anası Hadice bt. Ali nâm hâtuna kefîl olmağın mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Şevvâli’l-mükerrem sene 1137. Şuhûdü’l-hâl: Ahmed Çelebi b. Mustafa, İbrahim b. Muharrem, el-Hâc Mustafa b. Ahmed, Halil Çelebi b. Mustafa, Mehmed b. Ahmed, Mustafa b. Ahmed.