Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 229 Hüküm no: 229 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühâni bt. Abdullah’ın vârisleri el-Hâc İbrahim ve Ahmed’in menzillerini es-Seyyid Mehmed b. Mustafa Efendi’ye sattıkları Deryâ-yı Sefîd cezîrelerinden Rodos cezîresinde Tire mahallesinde sâkine iken bundan akdem vefât eden Ümmühâni bt. Abdullah b. Abdülmennân’ın verâseti mevlâ-yı utâkası Hüseyin’in oğlu Mustafa nâm kimesnenin oğulları el-Hâc İbrahim ve Ahmed nâm kimesnelere münhasıra olduğu lede’ş-şer‘i’l-enver zâhir ve mukarrer oldukdan sonra mezbûr el-Hâc İbrahim kendi tarafından asâleten ve karındaşı mezbûr Ahmed b. Mustafa b. Hüseyin tarafından bey‘-i âti’z-zikre vekîl olduğu es-Seyyid Ahmed Hoca b. Mustafa ve Mehmed Hoca b. Ali nâm kimesneler şehâdetleriyle sâbit olmağla vekâleten meclis-i şer‘de işbu sâhibü’l-kitâb es-Seyyid Mehmed b. Mustafa Efendi nâm kimesne mahzarında bi’l-asâle ve bi’l-vekâle ikrâr ve takrîr-i kelâm edip müteveffât-ı mezbûre Ümmühâni’nin terekesinden olup karye-i mezbûrede sâbıku’z-zikr Tire mahallesinde vâki‘ bir tarafdan müşterî-i mezbûr es-Seyyid Mehmed mülkü ve bir tarafdan Kapancı Ahmed mülkü ve bir tarafdan cidâr-ı hısn ve bir tarafdan ba‘zen Bekir mülkü ve ba‘zen tarîk-i âm ile mahdûd tahtânî iki bâb harâb oda ve kenîf ve havlu ve bir mikdâr bahçeyi ve müşterek bi’r-i mâyı müştemil mülk menzili asâlet ve vekâletim hasebiyle mezbûr es-Seyyid Mehmed’e tarafeynden îcâb ve kabûlü hâvî bey‘-i bâtt-ı sahîh-i şer‘î ile altmış guruş ile mechûlü’l-aded fülûsuna bey‘ u temlîk ve mahallinde kabz ve tasarrufa taslît eylediğimde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr altmış guruş ile mechûlü’l-aded fülûsa mezbûr es-Seyyid Mehmed yedinden ahz u kabz ve zikr olunan bir kabza fülûsu işbu meclis-i şer‘de izâ‘at ve itlâf eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi mezbûr es-Seyyid Mehmed’in mülk-i müşterâsı olup benim ve karındaşım müvekkil-i mezbûr Ahmed’in kat‘an alâka ve medhalimiz kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâlis min-Zilka‘deti’ş-şerîfe sene 1137. Şuhûdü’l-hâl: Salih Ağa [b.] İbrahim, Mustafa b. Ahmed, Kocabaş Hüseyin, Sancaktaroğlu Hüseyin, Mehmed Kapudan birâder-i Şerif İbrahim, el-Hâc Hasan Hoca b. Hüseyin, Tüccar es-Seyyid Osman, Küfelân Mehmed Reis, İbrahim Çelebi b. Muharrem.