Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 229 Hüküm no: 230 Orijinal metin no: [32b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Ali’nin menzilini Süleyman Beşe b. Hüseyin’e sattığı Mahrûse-i Galata muzâfâtından kasaba-i Fındıklı’da Molla Çelebi mahallesinde sâkin Ahmed Beşe b. Ali nâm kimesne meclis-i şer‘de işbu râfi‘u’l-kitâb Süleyman Beşe b. Hüseyin nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup kasaba-i mezbûrede İbrahim Efendi mahallesinde vâki‘ bir tarafdan Abdullah Beşe mülkü ve bir tarafdan Dilaver Beşe mülkü ve iki tarafdan tarîk-i âm ile mahdûd fevkānî iki bâb oda ve dehlîz ve tahtânî bir bâb oda ve bi’r-i mâ ve kenîf ve cüneyneyi muhtevî mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Süleyman Beşe’ye yüz altmış iki guruşa bey‘ u temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz altmış iki guruşu mezbûr Süleyman Beşe yedinden tamâmen ahz u kabz eyledim ba‘de’l-yevm menzil-i mahdûd-ı mezbûr bi-cemî‘i mâ yeştemilühû ve yahvîhi mezbûr Süleyman Beşe’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fî 4 Zilka‘de sene 1137. Şuhûdü’l-hâl: Ali b. Musli, Abdullah b. İbrahim, Mustafa b. Mehmed, Hüseyin b. İbrahim, Mehmed b. Ramazan, es-Seyyid Mehmed b. el-Hâc İsmail, el-Hâc Mustafa b. el-Hâc Abdurrahman.