Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 233 Hüküm no: 233 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühâni bt. Abdullah’ın Mehmed Bey b. Abdullah’dan muhalaa ile boşandığı Mahrûse-i Galata muzâfâtından kasaba-i Fındıklı’da Perizât Hâtun mahallesinde sâkine Ümmühâni bt. Abdullah b. Abdülmennân nâm hâtun tarafından ber-vech-i âtî hul‘ ve ibrâya vekîl olduğu zât-ı mezbûreyi ma‘rifet-i şer‘iyye ile ârifân İmâm İbrahim Efendi b. Abdullah ve Mustafa Çelebi b. Abdullah nâm kimesneler şehâdetleriyle sâbit olan es-Seyyid İsmail b. es-Seyyid Ali nâm kimesne meclis-i şer‘de müvekkile-i mezbûrenin zevc-i muhâlı‘ı Mehmed Bey b. Abdullah mahzarında bi’l-vekâle ikrâr ve takrîr-i kelâm edip müvekkile-i mezbûre Ümmühâni’nin zevci mezbûr Mehmed Bey ile beynlerinde hüsn-i zindegânîleri olmayıp hul‘a tâlibe ve râgıbe olduğu cihetle zimmetinde mütekarrır ve ma‘kūdün-aleyh olan bin beş yüz akçe mehr-i mü’eccelinden fâriğa olup nafaka-i iddet ve me’ûnet-i süknâsı kendi üzerine olup ve yetmiş guruş bedel-i hul‘ vermek üzere mezbûr Mehmed Bey ile bi’l-vekâle muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru kabûl ve bedel-i hul‘ olmak üzere meblağ-ı mezbûr yetmiş guruşu yedimden tamâmen ahz u kabz eylediğinden sonra hukūk-ı zevciyyete ve bedel-i hul‘-i mezbûra müte‘allika âmme-i da‘vâdan mezbûr Mehmed Bey’in zimmetini ibrâ ve ıskāt eylediğimde ol dahi hukūk-ı zevciyyete ve müvekkile-i mezbûre Ümmühâni Hâtun’dan tasaddî eylediği on bir İstanbul altunu ve üç tuğrâlı ve bir zincirli altun ve otuz altı guruş kıymetli iki kırmızı çuka biniş ve on guruş kıymetli bir kanaviz biniş ve iki kırmızı cedîd çuka dolama ve iki kırmızı çuka çakşir ve beş guruş kıymetli iki beyâz sâde ve on guruş kıymetli bir şal kuşak ve on guruş kıymetli iki fısdîkî şal ve on üç guruş kıymetli üç bohça ve dört guruş kıymetli beş makreme ve altı guruş kıymetli iki destar ve bir mest babuc ve karındaşı işbu hâzır bi’l-meclis el-Hâc Hamza yediyle verdiği on sekiz guruş kıymetli bir sincâbî çuka ferâce ve bir kutnî anteri ve bir sandal çintiyân ve serpûş ve yemenî ve bir örenşâhi anteri ve sandal kürk kabı vesâir târih-i kitâba gelince beynlerinde cereyân eden hukūka müte‘allika âmme-i de‘âvî ve mutâlebât ve eymân ve muhâsamâtdan müvekkile-i mezbûre Ümmühâni ile benim zimmetimizi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ ve’l-ışrîn min-Şevvâli’l-mükerrem sene 1137. Şuhûdü’l-hâl: Umdetü’l-mevâliyyi’l-izâm İbrahim Efendi b. Yusuf sâbık Galata kādısı, el-Hâc Mustafa Efendi b. Ali, İmâm İbrahim Efendi, Yusuf Yazıcı b. Abdullah, el-Hâc Ahmed b. Abdullah, Mehmed Çelebi b. Ali, el-Hâc Hamza b. Abdullah, Mehmed b. Ali, Osman Çelebi b. Abdullah, Mehmed b. Mustafa, İbrahim Çelebi b. Muharrem.